Балаҕан ыйын 1
Балаҕан ыйын 1 күнүгэр, 62 сыл анараа өттүгэр, оскуолаҕа үөрэнэ киирбитим. Балаҕан ыйын 1 күнүн, үөрүүлээх линейканы өйдөөбөппүн. Бука эрдэттэн тэринэн, үөрэн-көтөн убайдарбын кытта илин - кэлин иилиҥкэйдэһэн бардаҕым буолуо. Үөрэнэр учебниктарбытын, суруйар, ааҕар- суоттуур тэтэрээттэрбитин оскуола биэрэр этэ. Чэрэниилэнэн, бөрүөнэн суруйар этибит. Сарсыарда халлаан сырдыар диэри чүмэчинэн сырдаттан үөрэнэрбит. Сарсыарда оскуолаҕа эрдэ кэллэххэ, оскуола иһин оттулла турар оһохтор эрэ сырдаталлара. Оскуолаҕа күн аайы өйүөлээх кэлэрбит. Өйүөбүт арыылаах, кумах саахардаах килиэп буолара. Ол өйүөбүт олус да минньигэс буолар этэ. Учууталбыт, Анна Егоровна, тимир куруускаларга чаанньыктан чэй кутан биэрэрэ. Бүтэһик уруокка өрүү остуоруйа кэпсээччи, биһиги ол түгэни күүтэр даҕаны этибит. Анна Егоровна оҕону хаһан да мөхпөт, олус үчүгэйдик, Оҕоҕо өйдөнүмтүө гына кэпсиир, быһаарар үтүөкэннээх учуутал этэ. Үөрэх, билии чиҥ акылаатын биһиэхэ кини уурбута. Биһиги маҥнайгы учууталбытыгар махталбыт, сүгүрүйүүбүт муҥура суох улахан !