Балаҕан ыйын 1 күнүнэн, күндү доҕоттоор!
Балаҕан ыйын 1 күнүнэн, күндү доҕоттоор! Билии күнүнэн! Биһиги көлүөнэ 10 сылы быһа, балаҕан ыйын 1 күнүгэр үөрэх дьыла саҕаланыытын бэлиэтээн, линейкалаан кэлбиппит. Бу, бастакы учууталбытын Анна Егоровна Батагаеваны кытта 1 кылааска түспүт хаартыскабыт. 1964 сыллаахха. 62 сыл анараа өттүгэр. Иккис хаартыскаҕа, Бүлүү оройуонун 1 Күүлэт нэһилиэгин орто оскуолатын 1974 сыллаахха үөрэнэн бүтэрэр оҕолор, кылааспыт салайааччытын Николай Михайлович Николаевы кытта турабыт. 52 сыл анараа өттүгэр. Үһүс хаартыскаҕа, үөрэппит учууталларбыт барахсаттар сырдык мөссүөннэрэ көстөр. Ахтылҕаннаах о5о саас... Ахтылҕаннаах кэрэ саас... Оччолорго күн наһаа сылаастык, олус сырдыктык тыгара, халлаан өссө күүскэ күөх, куруук ыраас буолара, хонууларга сибэкки арааһа хойуутук үүнэрэ, ойуур- тыа маһа- ото хойуу, сыта-сымара ордук минньигэс курдуга. Дьон сэргэ наһаа аламаҕайа, бэйэ-бэйэлэригэр сыһыаннара олус истиҥэ... Тоҕо диэтэххэ, биһиги дьоллоох оҕо сааспыт кэрэ кэмэ этэ. Тулабытын барытын оҕо хара5ынан сөҕө- махтайа, сэргии көрөр, ыраас, туҥуй дууһабытынан үөрэ- көтө ылынар кэммит этэ. Тулалыыр эйгэни кытта саҥа билсэр-көрсөр, олохпут устатын тухары умнуллубат үтүө түгэннэр тиийэн кэлэ турар кэмнэрэ... Төрөппүттэрбит чэгиэн-чэбдик, аттыбытыгар баар кэмнэрэ. Кинилэр баар буоланнар силистээх-мутуктаах, тирэхтээх, көмүскэллээх курдук сананар кэммит... Учууталларбыт барахсаттар... Биһиги учууталларбыт үрдүк култууралаах, дириҥ билиилээх , оҕо кутун дьиҥнээхтик тутар, оҕо уйулҕатын чахчы хамсатан үтүөҕэ-кэрэҕэ сирдиир, оҕоҕо ийэлии-аҕалыы сыһыаннаах саха саарыннара этилэр. Бүгүн, Билии күнүгэр, учуутал үрдүк аатыгар сүһүөхтээх бэйэбит сүгүрүйэн, улахан барҕа махтал тылларын этэбит!