Биирдэ ыкса ыалларбар, табаарыһым Валентин төрөппүттэригэр, Мавра Ивановна,Гаврил Афана...
Биирдэ ыкса ыалларбар, табаарыһым Валентин төрөппүттэригэр, Мавра Ивановна,Гаврил Афанасьевич Федотовтарга киирэн кэпсэтэ-кэпсэтэ чэй иһэ олордохпутуна, дьиэлээх хаһаайын Гаврил Афанасьевич: "Өлүөсэ, эн эдэр киһи үөрэнэн, идэ ылыаҥ этэ,"- диэтэ. Итинтэн ыла: "Кырдьык даҕаны, үөрэнэн сөбүлүүр идэбин ылыахха баар этэ,"- диэн санаа миигиттэн арахсыбат буолбута. Бу сылларга управляющайынан сүрдээх үрдүк култууралаах, үлэ диэн баран муннукка ытаабыт, ыспарсымыан бэрдэ Василий Федотович Томскай үлэлиирэ. Үлэһиттэригэр наһаа да болҕомтолоох, киһи кыаҕынан, сатабылынынан көрөн аттаран туруорар, куруук өйүү- көмөлөһө сылдьар салайааччы этэ. Онтон биригэдьиирбитинэн Гаврил Васильевич Софронов үлэлиирэ. Гаврил Васильевич оччоттон баччаҕа дылы сыанаттан түспэт ырыаһыт бэрдэ. Биирдэ оппутун ыйаан, түҥэтэн баран кыбыыга, кэбиһиилээх окко өйөнөн олорон олох-дьаһах, инники былаан туһунан кэпсэттибит. Мин култуура эйгэтигэр үөрэнэр баҕалаахпын истэн баран: "Дьокуускайга култуурунай-сырдатар училище баар, онно киир. Бүтэрэн баран, хата манна кэлэн кулууппутугар дириэктэрдиэҥ,"-диэтэ. Кырдьык, култуура, искусство эйгэтигэр үлэбин, Чурапчы Хайахсытыгар кулууп дириэктэринэн саҕалаабытым. Алексей Павлов, Арассыыйа култууратын үтүөлээх үлэһитэ, Саха Өрөспүүбүлүкэтин норуодунай артыыһа, Арассыыйа "Култуураҕа уонна искусствоҕа үтүөлэрин иһин" уордьанын кавалера, Федор Волков аатынан Арассыыйа Бырабыыталыстыбатын бириэмийэтин лауреата, Бүтүн Сойуустааҕы эстрада артыыстарын күрэҕин лауреата, Саха Өрөспүүбүлүкэтин култууратын уонна искусствотын бочуоттаах үлэһитэ, Саха Өрөспүүбүлүкэтин ыччакка бэлиитикэтин туйгуна, Саха хомсомуолун бириэмийэтин лауреата, Бүлүү улууһун ытык киһитэ, Бүлүү улууһун 1 Күүлэт нэһилиэгин ытык киһитэ, Чурапчы улууһун Хайахсыт нэһилиэгин ытык киһитэ