ХОМСОМУОЛ ТЭРИЛЛИБИТ КҮНҮНЭН!
ХОМСОМУОЛ ТЭРИЛЛИБИТ КҮНҮНЭН! Мин хомсомуолга 1972 сыллаахха 8 кылааска үөрэнэ сылдьан сүрдээҕин баҕаран, дьаныһан туран киирбитим. Хомсомуолга үчүгэй үөрэхтээх, оскуола уопсастыбаннай олоҕор актыыбынайдык кыттар буоллаххына биирдэ ылаллара. Хомсомуолга саас киирбиппит. Хомсомуолга киирээри улаханнык долгуйбутум, хомсомуол устаабын нойосуус үөрэппитим оло5ум биир умнуллубат үтүө өйдөбүлэ буола сылдьар. Хомсомуол оройуоннааҕы кэмитиэтиттэн Раиса Васильевна Ли-цай уонна "Күүлэт" совхоз хомсомуолун сэкэрэтээрэ Иннокентий Петрович Платонов 1 Күүлэккэ кэлэн биһигини хомсомуолга киллэрбиттэрэ. Хомсомуолга киирээппин кытта, миигин оскуолам хомсомуолускай кэмитиэтигэр киллэрэн, үөрэх секторынан талбыттара. Мин сүрүн соругум диэн үөрэхтэригэр мөлтөөрү гыммыт о5олорго үчүгэйдик үөрэнэр оҕолору сыһыарыы, үөрэхтэригэр үчүгэй буолалларын хонтуруолллааһын. Биһиги оскуолаҕа үөрэнэрбит саҕана, күнүс 4 чаастан киэһэ 6 чааска дылы уруок аахтыыта буолара. Ити кэмҥэ, хомсомуоллар оҕолор уруок ааҕалларын хонтуруоллуурбут. Саас уруок ааҕар бириэмэҕэ, оҕолор уулуссаҕа суох буолуохтаахтар диэн, кыһыл повязка баанан баран уулуссалары кэрийэр буола сылдьыбыппыт. Арай тохсус кылааска үөрэнэ сылдьан, нуучча тылыгар изложения суруйуутугар икки сыананы ыллым. Нуучча тылыгар үчүгэй этим ээ. Бэйэм да соһуйан хааллым. Олус хомойдум. Хомсомуол кэмитиэтин мунньаҕар үөрэх секторыттан аккаастанааччы буоллум:"Хайдах икки сыананы ыла сылдьар киһи үөрэх сектора буола сылдьыахпыный, үөрэх секторыттан тохтотуҥ",- диэн. Ону:"Икки сыанаҕын көннөрүөҥ буоллаҕа",- диэн истэ даҕаны барбатылар. Кырдьык, сотору буолаат икки сыанабын көннөрөн үөрбүтүм-көппүтүм. Онус кылааска үөрэнэ сырыттахпына, 1974 сыл сааһыгар оскуолабыттан Оройуоннааҕы хомсомуол конференциятыгар делегат быһыытынан, Бүлүү куоратыгар ыытан кытыннарбыттара. Онно Социалистическай Үлэ Дьоруойа Петр Иванович Протопопов эдэр ыччакка анаан, уоттаах-төлөннөөх тыл этиитин истибит дьоллоохпун. Делегаттарга анаан кэнсиэр көрдөрбүттэрэ. Кэнсиэргэ ол кэмнээҕи "Таптал кыыма хаһан эрэ..." диэн уостан түспэккэ ыллана сылдьар ырыаны, ити ырыаны айбыт Николай Константинов бэйэтин толоруутугар истэн турабын. Н.Г. Чернышевскай аатынан Бүлүүтээҕи педагогическай училище устудьуона Лена Керемясова ( билигин Саха тэлэбидиэнньэтин үлэһитэ) "Гляжу в озера синие..." диэн ырыаны олус үчүгэйдик, үрдүк таһымҥа толорон биһирэбили ылбыта. Конференция кыттыылаахтарыгар, хас биирдиибитигэр, ырыанньык бэлэхтээбиттэрэ. Ол ырыанньыкка "Не растанусь с комсомолом", "Мой адрес Советский Союз", "Манжерок" диэн ырыалар баалларын өйдүүбүн. Оскуоланы бүтэрэн фермаҕа үлэлии сырыттахпына, олохтоох хомсомуолускай тэрилтэ ll-с сэкэрэтээринэн талбыттара. Мин үлэм ыччат сынньалаҥын тэрийии, бырааһынньыктарга истиэнэ хаһыатын таһаарыы, хомсомуол чилиэттэриттэн дьиэлэрин кэрийэ сылдьан хомсомуолускай усунуос хомуйуута этэ. Биирдэ Жулина диэн араспаанньалаах нуучча биэлсэр кыыһы кытта усунуос хомуйа сылдьыбытым. Онно Васильева Ирина Иннокентьевналаахха сылдьыбыппыт, бука оҕолоруттан Лидия Филипповнаттан уонна Иннокентий Филипповичтан- Тэгэттэн хомсомуолускай усунуостарын ылаары буолуо. Ирина Иннокентьевна Жулинаҕа:"Тоҕо бу бачча үчүгэй кыыһы,биэлсэри нэһилиэкпит уолаттара кэргэн ылан, манна нэһилиэкпитигэр хаалларбаттара буолуой",- диэбитэ. Онно Жулина:" Оо, бэрт буолуо этэ даа, ылбаттар ээ, Ирина",- диэн оонньуу-көр курдук кэпсэтии буолбута. Жулина сотору кэминэн, дойдутугар соҕуруу барбыта. Табаарыспынаан Валентин Федотовтыын хас субуота аайы үҥкүү киэһэлэрин тэрийэн ыытарбыт. Элэктириичэстибэ 12 чааска араарыллара. Оччолорго дизель уот биэрэрэ. Элэктириичэстибэни 12 чааска ылбакка, уһатарга диэн көрдөһө Сэбиэт бэрэссэдээтэлигэр Василий Алексеевич Пахомовка дьиэтигэр барарбыт. Василий Алексеевич биирдэ даҕаны аккаастаабата5а. Дизелиискэ, Ион Семенович Дмитриевка көҥүллүүр сурук суруйан биһигиннэн ыытара. Истиэнэ хаһыатын улахан бырааһынньык аайы, уруһуйдаан киэргэтэн, суругун барытын суруйан таһаарарым.