21 октябрҙә Өфөләге «Таланттар ҡалаһы» ижад һәм үҫеш үҙәгендә «Башҡорт телендә мобиль у...
21 октябрҙә Өфөләге «Таланттар ҡалаһы» ижад һәм үҫеш үҙәгендә «Башҡорт телендә мобиль уйындар» проектының презентацияһы үтте. Сарала мәктәп уҡыусылары, студенттар, журналистар, блогерҙар һәм саҡырылған ҡунаҡтар ҡатнашты. Ҡатнашыусылар башҡорт телендә эшләнгән өс мобиль уйын менән танышты һәм уларҙы үҙҙәре лә уйнап ҡараны. Проект сиктәрендә «Әлләсе», «Вордли» һәм «Зирәк» уйындары әҙерләнгән. «Әлләсе» уйынында ҡатнашыусыларға һүҙҙе үҙен әйтмәйенсә аңлатырға кәрәк. Уйын һүҙ байлығын арттырырға, фекерҙе аныҡ һәм тапҡыр итеп еткерергә ярҙам итә. Башҡорт телен яңы өйрәнә башлаған кешеләр өсөн дә уңайлы булһын өсөн, һүҙҙәрҙең русса тәржемәһе һәм башҡортса аудиояҙмалары ҡаралған. «Вордли» — йәшерелгән һүҙҙе табыу өсөн логик фекерләүҙе һәм телде белеүҙе талап иткән уйын. Ҡатнашыусылар һүҙҙе төрлө варианттар тәҡдим итеп таба, ә һәр яңы яуап хәрефтәрҙең дөрөҫлөгөн тикшерергә ярҙам итә. «Зирәк» уйыны иһә тиҙ фекерләүҙе, тапҡырлыҡты һәм һүҙ байлығын һынай. Уны башҡорт һәм рус телдәрендә уйнарға мөмкин. Презентация барышында ҡатнашыусылар уйындарҙы һынап ҡараны, үҙ-ара ярышты һәм һорауҙарға яуап бирҙе. Уйын блоктары араһында проектты әҙерләүселәр сығыш яһаны. Башҡорт телен һаҡлау һәм үҫтереү ойошмаһы директоры Гөлназ Йосопова, башҡорт телендәге мобиль уйындар проекты етәксеһе Гүзәлиә Исхакова, «Әлләсе» һәм «Зирәк» уйындарын эшләүсе Айнур Хәйбуллин, «Вордли» уйынын эшләүсе Вәлит Түләбаев ҡатнашыусыларға проекттың барлыҡҡа килеүе һәм уйындарҙы әҙерләү үҙенсәлектәре тураһында һөйләне. «Беҙҙең өсөн башҡорт телендә уйындар булдырыу ғына түгел, ә уны көндәлек тормоштоң бер өлөшөнә әйләндереү мөһим ине. Тел дәрестәрҙә һәм рәсми сараларҙа ғына түгел, аралашыуҙа, һанлы мөхиттә, балаларҙың һәм йәштәрҙең ялын ойоштороуҙа ла яңғырарға тейеш. Өс уйындың һәр береһенең үҙ бурысы бар: береһендә һүҙҙәрҙе аңлатырға, икенсеһендә дөрөҫ яуапты табырға, өсөнсөһөндә тиҙ фекерләргә кәрәк. Шул уҡ ваҡытта ҡатнашыусылар ябай ғына уйнап ултырмай, ә телде ҡуллана, таныш һүҙҙәрҙе иҫенә төшөрә, яңыларын өйрәнә һәм үҙ фекерен белдерергә күнегә», — тине Башҡорт телен һаҡлау һәм үҫтереү ойошмаһы директоры Гөлназ Юсопова. Сарала шулай уҡ Башҡортостан Республикаһы Башлығы гранттары фонды директоры Люциә Сәйфуллина һәм Башҡортостан Республикаһы Мәғариф һәм фән министрлығының Милли мәғариф идаралығы начальнигы Нил Ишемғолов ҡатнашты. Проект Башҡортостан Республикаһы Башлығы гранттары фонды ярҙамында тормошҡа ашырылды. Проект командаһы башҡорт телендә яңы һанлы мөмкинлектәр булдырыуҙы һәм телде өйрәнеүгә ҡыҙыҡһыныуҙы арттырыуҙы дауам итергә ниәтләй. Уйындарҙы һылтанмалар аша үҙегеҙгә күсереп алырға мөмкин. Куар-кодлы һылтанмалар - фотоларҙа. "БАШҠОРТСА ВОРДЛИ" Ru Store: www.rustore.ru/catalog/ap... Andriod: play.google.com/store/apps... IOS: apps.apple.com/app/id6766... "ӘЛЛӘСЕ" App Store — apps.apple.com/app/id6800... Google Play — play.google.com/store/apps... "ЗИРӘК" App Store: apps.apple.com/app/id6801... GooglePlay:play.google.com/store/apps... Тулыраҡ – бында: https://amanat.su/news/novosti/2026-10-22/bash-ort-telen-uyyn-asha-yr-n-be-4851865