Стәрлетамаҡтан бер ҡатын Сүриәләге террористик ойошма составында булғаны өсөн хөкүм ителде — 27 августа 2026 г. в 06:55:14.312
Стәрлетамаҡтан бер ҡатын Сүриәләге террористик ойошма составында булғаны өсөн хөкүм ителде Рәсәй Федерацияһының Башҡортостан Республикаһы буйынса Федераль именлек хеҙмәте идаралығы (УФСБ) Рәсәй Федерацияһы территорияһында тыйылған халыҡ-ара террористик ойошма эшмәкәрлегендә ҡатнашҡан 41 йәшлек Стәрлетамаҡ кешеһенең енәйәтле ҡылыҡтарын туҡтатты. Үткәрелгән оператив-эҙләү саралары барышында асыҡланыуынса, Стәрлетамаҡта йәшәүсе ҡатын, 2014 йылда радикаль ислам идеологияһы йоғонтоһона бирелеп,Рәсәйҙән сығып киткән һәм законһыҙ ҡораллы берләшмәгә ҡушылған. Сүриә Ғәрәп Республикаһы территорияһында булған осорҙа ул тыйылған ойошманың эшмәкәрлегендә әүҙем ҡатнашҡан, боевиктарҙың йәшәүен тәьмин итеүгә йүнәлтелгән эштәрҙе башҡарған. Бынан тыш, ҡатын Сүриәлә хөкүмәт ғәскәрҙәренә ҡаршы хәрби бәрелештәрҙә ҡатнашыу өсөн утлы ҡорал һәм шартлатҡыс ҡоролмалар менән эш итергә өйрәнгән. Террористик төркөм тар-мар ителгәндән һуң, ул Төркиә биләмәһендә йәшеренеп ята, тик унда тотолоп Рәсәй Федерацияһына депортацияланған. Мәскәү ҡалаһының 2-се Көнбайыш округ хәрби суды хөкөмө менән енәйәтсе Рәсәй Федерацияһы Енәйәт кодексының 205.5-се статьяһының 2-се өлөшө, 208-се статьяһының 2-се өлөшөндә ҡаралған енәйәттәрҙе ҡылыуҙа ғәйепле тип танылды. Уға дөйөм режимлы төҙәтеү колонияһында 13 йылға иркенән мәхрүм итеү һәм 400 000 һум күләмендә штраф түләү язаһы тәғәйенләнде. Апелляция хәрби суды ҡарары менән хөкөм үҙгәрешһеҙ ҡалдырылды һәм законлы көсөнә инде. Рәсәй Федерацияһының Башҡортостан Республикаһы буйынса УФСБ матбуғат хеҙмәте мәғлүмәттәре буйынса. Фото:Башинформ.