Бүген районыбызның Бөрбаш авылында-Байлар Сәрдегәнендә Чишмә бәйрәме. — 31 июля 2026 г. в 17:19:16.343
Бүген районыбызның Бөрбаш авылында-Байлар Сәрдегәнендә Чишмә бәйрәме. Еллар дәвамында матур төсмерләре белән күңелләрдә урын алган бәйрәм быел да искиткеч матур оештырылган, аның башлангычы-тарихы турында Румия ханым бик яхшылап аңлатып үтте. Ямьле табигать кочагында - челтерәп ага чишмәсе, җәлеп итә сиртмә коесы - кечкенә генә мәйдан бөтен милли уеннарны да үз эченә алган. Шушы игелекле гамәлләрнең башында торган Хәсән абый малайларының әниләре Нурзидә апа да биредә, нур өстенә нур булып бәйрәмне яратып күзәтә. Ә бәйрәм гаҗәеп матур, бүләкләр күп, уеннар кызык. Көрәш тә мавыктыргыч узды, батырлар белән газета битләрендә таныштырырбыз. Әлеге бәйрәмнең кадерле кунаклары, җырчылар Алсу-Азат Фазлыевлар, Вадим Заһаров, Фирдүс Тямаев бәйрәмгә моңнары аша күтәренке рух өстәде. Мәйданга Җәлил хәзрәт Фазлыев бертөркем кунаклар белән килеп керде, бүләкләнүчеләр дә күп булды. Балтач-хикмәтле як, ди бер кунагыбыз. Аның кешеләре дә хикмәтле, менә шушындый юмарт, мәнле, мәгънәле. Яшәсен иде әле бу Чишмә бәйрәме, авылга Хәсән малайлары саналган данлы эз. Күбрәк фото биредә - https://baltaci.ru/photo/cisma-bairame-2026