БҮТҮН РОССИЯТАҔЫ БИБЛИОТЕКА КҮНҮНЭН 🎉📚 — 27 мая 2026 г. в 03:44:47.726
БҮТҮН РОССИЯТАҔЫ БИБЛИОТЕКА КҮНҮНЭН 🎉📚 Убаастабыллаах Уус Алдан улууһун библиотекатын эйгэтин үлэһиттэрэ, бэтэрээннэрэ! Эһигини бүгүҥҥү идэлээх бырааһынньыккытынан улуус дьаһалтатын уонна тус бэйэм ааппыттан итиитик-истиҥник эҕэрдэлиибит! Улуус библиотекатын устуоруйата 1937 сыллаахха оройуоннааҕы библиотека аһыллыбытыттан саҕаланар. Библиотека бастакы сэбиэдиссэйинэн Татьяна Фоминична Замятина анаммыта. Саҥа тэриллибит библиотека норуокка билиини-көрүүнү тарҕатыыга күүскэ үлэлээбитэ. Салгыы 1947-1948 сылларга библиотеканы салайбыт Акулина Павловна Копырина үлэни өссө хаҥатан, кэҥэтэн испитэ. Кинилэр күүстээх үлэлэрин түмүгэр 1953 сылтан тыа сирин кулууптарын иһинэн үлэлиир библиотекалар туспа тэрилтэ буолан, саҥа таһымҥа тахсыбыттара. 1961 сыллаахха оройуоннааҕы культура отделын бирикээһинэн оҕо библиотеката тэриллибитэ. Библиотекалар сайдыыларыгар улахан кэрдииһинэн 1976 сыллаахтан саҕаламмыт кииннээһин үлэтэ буолбута. 1978 сыллаахха оройуоннааҕы библиотекаҕа кииннэнэн 22 тыа библиотекалара уонна оҕо библиотеката холбоһон, Уус Алданнааҕы кииннэммит библиотека тиһигэ тэриллибитэ. Дириэктэринэн ССРС культуратын туйгуна Светлана Ивановна Максимова анаммыта. Кини салайыытынан библиотекалар норуот хаһаайыстыбатын үлэһиттэрин информациянан, литературанан хааччыйыыга, үлэ бастыҥ уопутун тарҕатыыга утумнаахтык үлэлээбиттэрэ. Онтон ыла библиотека эйгэтигэр үгүс көлүөнэ дьон бэйэлэрин олохторун анаан, умсугутуулаахтык үлэлээн-хамсаан кэллилэр. 1993 сылтан кииннэммит библиотека тиһигин Саха Өрөспүүбүлүкэтин култууратын үтүөлээх үлэһитэ Варвара Николаевна Окоемова салайан, таһаарыылаахтык үлэлээбитэ. 1997 сылтан Киин библиотека биллиилээх государственнай, общественнай деятель, поэт Сергей Степанович Васильев - Борогонскай аатын сүгэр. Бэрт Ууһугар, Окоемовкаҕа, Өнөргө, Арыылаахха, Бэйдиҥэҕэ, Майаҕаска, Тулунаҕа, Байаҕантайга саҥа библиотека дьиэлэрэ тутуллан үлэҕэ киирбиттэрэ. Күн бүгүн кииннэммит библиотека тиһигин Лена Семеновна Павлова салайар. 28 библиотека, ол иһигэр Сергей Степанович Васильев - Борогонскай аатынан киин библиотека, Оҕо уонна ыччат ааҕар киинэ, 26 нэһилиэк филиаллара айымньылаахтык үлэлээн-хамсаан олороллор. Ааспыт сылтан киин библиотека «Дьиэ кэргэн» национальнай бырайыак чэрчитинэн ыытыллар куонкуруска ситиһиилээхтик кыттан, саҥа көлүөнэ федеральнай библиотекатын статуһун ылбыттара. Быйыл оҕо библиотекатын иһинэн «Сандаар» сахалыы ааҕар Киин, кииннэммит библиотека тиһигин иһинэн «Айылҕа ситимэ» экологическай үлэни сырдатар Киин үлэлэрин саҕалаатылар. Күндү библиотека үлэһиттэрэ, бэтэрээннэрэ! Эһиги бары күүскүтүн-уоххутун, билиилэргитин анаан, кинигэ кистэлэҥнээх эйгэтин ааҕааччыларга арыйан, Сахабыт сирин духуобунай баайын харыстыыгыт, кэлэр көлүөнэҕэ тиэрдэҕит. Эһиэхэ чэгиэн доруобуйаны, айымньылаах үлэҕитигэр үрдүк ситиһиилэри, дьиэ кэргэҥҥитигэр дьоллоох олоҕу баҕарабыт! Уус Алдан улууһун баһылыга Василий Алексеев.