«Эколята» лааҕырга "Төрөөбүт дойдубун, таптыыбын" диэн дьарык. — 9 июля 2026 г. в 08:00:10.740
«Эколята» лааҕырга "Төрөөбүт дойдубун, таптыыбын" диэн дьарык. Бороҕоммутугар куйаас муҥутаабыт от ыйын 9 күнүгэр, Мүрүтээҕи эдэр натуралистар станцияларын «Эколята» үлэ уонна экология лааҕырын оҕолоругар "Төрөөбүт дойдубун, таптыыбын" диэн дьарык ыытылынна. Бу дьарыкка С.С.Васильев – Борогонскай аатынан киин бибилэтиэкэ үлэһиттэрэ Мария Заболоцкая, Сахаайа Копырина Уус Алдан улууһун кэрэ сирдэрин, бибилэтиэкэ интернет саайтыгар баар "Айылҕа ситимэ" сыһыарыыны билиһиннэрдилэр. Салҕыы оҕолорго аналлаах "Кини кимий?" биктэриинэни оонньоттулар, онтон икки хамаандаҕа арахсан араас мүлчүргэннээх түһүмэхтэрдээх эстафетаҕа күрэхтэстилэр. Бу эстафетаҕа оҕолор сахалыы остуоруйаны мүнүүтэҕэ ааҕан, "Тэтим таас", "Балыксыт" оонньууларга оонньоон, Сахабыт сирин кыылларын суолларын таайан олус сэргэхсийдилэр. Лааҕырга эрдэттэн араас үүнээйилэри, кыыллары үөрэппит буоланнар оҕолор бэрт элбэҕи билэллэрэ көһүннэ. Түмүгэр уопсай хаартыскаҕа түһэн, станцияҕа баар үүнээйилэри, тыыннаах муннугу көрдөрөн оҕолор уонна Мүрүтээҕи эдэр натуралистар станция үлэһиттэрэ махталларын биллэрдилэр.