Саха Өрөспүүбүлүкэтин норуотун маастара Пелагея Степановна Максимова 100 сыллаах үбүлүө...
Саха Өрөспүүбүлүкэтин норуотун маастара Пелагея Степановна Максимова 100 сыллаах үбүлүөйэ истиҥник бэлиэтэннэ Саха Өрөспүүбүлүкэтин норуотун маастара Пелагея Степановна Максимова төрөөбүтэ 100 сылыгар анаммыт «Ийэ сылаас илиитин иэйиитэ» диэн үөрүүлээх тэрээһин олус иһирэхтик буолан ааста. Тэрээһини Тулуна библиотекатын сэбиэдиссэйэ Маргарита Васильевна Неустроева аста. Кини Пелагея Степановна II Лөгөй нэһилиэгэр култуура, үөрэх сайдыытыгар киллэрбит сүдү кылаатын ахтан ааста. Ол курдук, Тулунаҕа ааҕар балаҕан арыллыытыгар үлэлээбитэ, «Иис-уус» ийэлэр түмсүүтүн тэрийэн дьахталлары иискэ уһуйбута, оннооҕор Тулунаҕа бастакынан оҕуруот олордуутун саҕаласпыт киһинэн буолар диэн кэпсээтэ. Үбүлүөйгэ ыалдьыттар Тимур Корякин ийэ туһунан истиҥ ырыатынан, «Дьүрүскэн» ансаамбыл хомуска оонньоон эҕэрдэлээтилэр. Маастар улахан кыыһа, СР култууратын туйгуна, Уус-Алдан Киин библиотекатын бэтэрээнэ Венера Гаврильевна Бочкарева ийэтин олоҕун суолун, үлэлэрин уонна быыстапкатын билиһиннэрдэ. Уус-Алдан улууһун дьаһалтатын уонна култуура управлениятын аатыттан Анна Егоровна Лугинова махталын тиэрдэн туран, Пелагея Степановна дьиэ кэргэнигэр эҕэрдэ бастыҥ тылларын анаата. Оттон Мүрү нэһилиэгиттэн Екатерина Михайловна Бочкарева 1993 сыллаахха Бороҕоҥҥо саха таҥаһын сөргүтэр күрэххэ Пелагея Степановна үлэтэ улахан биһирэбили ылан кыайыылаах тахсыбытын сырдатта, дьонун-сэргэтин эҕэрдэлээтэ. Тэрээһин чэрчитинэн ыытыллыбыт «Иис-үүс алыба» диэн аһаҕас өрөспүүбүлүкэтээҕи күрэххэ уопсайа 44 үлэ кытынна (онтон 38-һэ аныгылыы, 6-та төрүт үгэһинэн тигиллибит суумкалар). Түмүккэ, аныгылыы халыыптаах суумкаҕа Лилия Петрова, онтон төрүт үгэһинэн тигиллибиккэ Александра Босикова инники күөҥҥэ таҕыстылар. Күрэх Чыпчаал аатын Уус-Алдан кыттааччыта Светлана Константинова ылан, ааптар оҕолорун аатыттан анал бэлэҕи тутта. Мария Захаровна Сивцева бэйэтин ахтыытыгар төрүт култуураҕа үлэлиэҕиттэн ыла Пелагея Степановнаны билэрин, кини олоҕун уонна айар үлгэтин суолун үрдүктүк сыаналыырын бэлиэтээтэ. Ону таһынан Мария Захаровна маастар сырдык аатын үйэтитиигэ анал бырайыактары олоххо киллэрэр наадатын эттэ. Бу курдук, үйэлээх үбүлүөйдээх тэрээһин биир киһи олоҕун эрэ буолбакка, бүтүн саха дьахтарын дьоҕурун, маастар киһи үйэлээх өйдөбүлүн уонна көлүөнэттэн көлүөнэҕэ бэриллэр үгэстэрин чиэстиир олус истиҥ бэлиэ тэрээһин буолан ааста.