"Өбүгэ үгэһэ - кэскилбит биһигэ"
"Өбүгэ үгэһэ - кэскилбит биһигэ" Сэтинньи 6 күнүгэр Олоҥхо этно-култуурнай киинигэр "Көлүөнэ ситимэ" диэн норуот педагогикатын сугулаана ыытылынна. Сугулаан түмсүүлэр үөрэх тэрилтэлэрин кытта ситимнээх үлэни тэрийэргэ, оҕолорго норуот үтүө үгэстэрин тарҕатарга, үгэстэри туттан төрүт үөрүйэхтэри тэрийэр сыаллаах тэрилиннэ. Үөрэх управлениятын салайааччыта Федор Федорович Татаринов сугулааны арыйан, билиҥҥи көлүөнэ оҕолоро оскуоланы бүтэрэн киэҥ олоххо баралларыгар, "мин сахабын, мин уус-алдаммын" диэн киэн тутталларын ситиһиэхтээхпит, онуоха сугулаан кыттыылаахтарыгар тэрээһин түмүгүнэн "онно мин тугу гыныахпын сөбүй?" диэн толкуй киириэхтээх диэн бэлиэтээтэ. Мунньахха Бэрт Ууһа нэһилиэгин дьаһалтатын, оскуолатын үлэһиттэрэ, түмсүүлэрэ бэйэлэрин этнопедагогикаҕа ыытар үлэлэрин уопуттарын үллэһиннилэр. "Уус кыһата" түмсүү салайааччыта Илларион Егорович Попов оскуоланы кытта бииргэ сайыҥҥы лааҕыр тэрийэн, оҕолору тимири охсорго, быһах оҥорорго, сахалыы сиэргэ-туомҥа үөрэтэллэрин, кэлин муҥха тэрийэр былааннаахтарын кэпсээтэ. "Эйэҕэс эбээлэр" түмсүү салайааччыта Альбина Львовна Неустроева библиотеканы кытта оҕолору сахалыы ааҕыыга, суруйууну сайыннарыыга болҕомтону уураллар эбит. Василий Иванович Копырин салайааччылаах "Эһээлэр түмүүлэрэ" төрүччүнү үөрэтиигэ үлэлиирин туһунан кэпсээтэ. В.В.Алексеев аатынан Мүрүтээҕи "Уолан" гимназия директорын иитэр үлэҕэ солбуйааччыта Уолан Васильевич Колодезников төрүт үгэстэри тутуһуу, сахалыы иитии туһунан кэпсээтэ. Кини "Байыанна-полевой хомуур", "Удьуор утума", муус ылыыта, муҥха, "Аҕа, уол, учуутал" күрэхтэрин уонна "Байдам" уо.д.а. курдук тэрээһиннэр тустарынан баай уопутун үллэһиннэ. Салгыы Суотту орто оскуолата оҕону үлэнэн иитиигэ, Уһун-Күөллээҕи "Чуораанчык" уһуйаан эбээ үөрэҕин нөҥүө патриотическай өйгө-санааҕа иитиигэ, * Баатаҕайдааҕы "Күнчээн" уһуйаан саха төрүт үгэстэригэр тэрийэр үлэлэрин туһунан кэпсээтилэр. Мүрүтээҕи эдэр натуралистар станциялара оҕону иитиигэ, өбүгэ булдун малын сөргүтэр үлэлэрин туһунан, Өспөх орто оскуолата "Дьиэ кэргэн тускула" электроннай хаһыат, "Сиэрдьит", "Удьуор ситимэ" бырайактарын иһитиннэрдилэр. Галина Никитична Иванова - Айтыына "Кэскил" этнопедагогика экодухуобунай сайдыы тирэҕин туһунан, киһи айылҕалыын ситимнээн сиэрдээхтик олоруутун туһунан кэпсээтэ. Кэлбит ыалдьыттар санаа атастастылар, түмсүүлэр сугулаан резолюцията ылылларыгар норуот педагогиката сайдарын туһугар бииргэ былааннаан үлэ тэрийэргэ этиилэри киллэрдилэр. Уус Алдан улууһун киин библиотеката "Норуот педагогиката - олох муудараһа" диэн дириҥ ис хоһоонноох быыстапканы туруорда. Тэрээһин биир сүдү бэлиэ түгэнинэн Россия Геройа Андрей Григорьев-Тутаны кытта көрсүһүү буолла. Көрсүүһүүгэ Уус Алдан улууһун баһылыга Василий Петрович Алексеев уонна оройуоннааҕы депуттаттар Сэбиэттэрин Бэрэссэдээтэлэ Иннокентий Иннокентьевич Аммосов тыл эттилэр, Григорьевтар дьиэ кэргэҥҥэ бэлэх туттардылар. Салгыы "Кэрэхсэбиллээх чахчылар" кинигэ ааптара Масаха Мэхээһи кытта көрсүһүү буолла. Көрсүһүүгэ ааптар бэйэтин туһунан кэпсээтэ, историяны билии суолтатын уонна тыа хаһаайыстыбатын тула санааларын үллэһиннэ.
Канал в каталоге Максиметера
84 подписчиков · Госорганы и учреждения