"Чолбон" айар кыһа бырайыагын муҥутуур кыайыылааҕа — Сардана Корякина — Сардаана "Тиийи... — 1 июля 2026 г. в 03:23:01.619
"Чолбон" айар кыһа бырайыагын муҥутуур кыайыылааҕа — Сардана Корякина — Сардаана "Тиийиэм дуо..." кэпсээнэ. 📖🖋 Үчүгэйиэн! Тикпит түннүгүм сабыытын быыһынан сарсыардааҥҥы сардаҥа өтөн киирэр, күн мэник уотугар хойуу, хара суһуоҕум толбоннура оонньуур. Эмискэ хараҕым ыскаап үрдүгэр сытар маҥан кыл сэлээппэҕэ хатанна. Бу хаһан эрэ ийэм барахсан кыыһым ыһыахха кэтиэ диэн бэлэхтээбитэ да, кэтиллибэккэ саһаран эрэр. Оттон аттыбар кэргэним туох да кыһалҕата суох бэрт кытаанахтык утуйан сыыгыныыр. Ити ытыһыгар ойууламмыт уһун-кылгас дьураа тугу кэпсиирэ буолуой? Тапталлаахпын кытта биир салгынынан тыынарбыттан, биир дьиэҕэ олорорбуттан, биир аһы аһыырбыттан наһаа да дьоллоохпун. Кини эрэ аттыгар олоҕум хас биирдии күнэ ураты күндү, хатыламмат кэрэ... Сылаас ытыһын оргууй имэрийэн ыла-ыла, утуйа сытар сэгэрбин одуулаһа сыттахпына, сүүрэн тыбыгырайар атах тыаһа иһилиннэ. Эргиллэн истэхпинэ, уолчааным быыкайкаан бэйэтэ ороҥҥо тилигирэйэн тахсан түөспэр хам сыста түстэ. Син балачча уһуннук саҥата суох куустуһан сыттыбыт. Сотору, хамсаабакка сытарыттан хал буолан, минньигэс сыттаах ытыһынан сапсынан ыла-ыла, тугу эрэ кэпсээн чыычаах оҕотун курдук чуубугараата, уоһа чорбоҥноото. Аҕабытын уһугуннарымаары оҕобун көтөҕөн куукунаҕа таҕыстым, утаппыта буолуо диэн чааскыга уу кутан биэрдим. Уолчааным уутун иһэн киллиргэттэ уонна кип-киэҥник килэччи көрөн туран улахан киһилии ыйытта: - Маамаа, эн миигин тоҕо таптыыгыный? Тоҕо диэтэр, мин котенок курдукпун даа?.. — Чукчуом, мой сыночка наһаа минньигэсчээн буоллаҕа-а-а! — Ээ, я понял! Ити барыта потому что я вчера арбуз кушал! Мамочка, оттон эн арбузтааҕар миллион раз минньигэскин! Ийэ уонна оҕо быстыспат ситимнээхтэр. Ийэ тапталын туох да солбуйбат. Эн хас да саастаах буол, ханнык да үрдүк дуоһунастан - эн син биир киниэхэ оҕоҕун. Бу ньилбэкпэр олорор уолчааным аҕыйах сылынан эмиэ ким эрэ тапталлаах кэргэнэ, амарах аҕата буолуо турдаҕа. Хаһан эрэ миигин суохтаан эмиэ бүгүҥҥү курдук чааскыга уу куттаран ыймахтыан баҕарыа... Хостон кэргэним бүтэҥи саҥата: — Чыычаах, турдугут дуо? - диэтэ. Бүгүн Туймаада ыһыаҕа. Эбээлээх бараары сылдьаллар. Биһигини барсаҕыт дуо диэбиттэрин аккаастаммытым, дьыалалаахпыт диэбитим. Эн ыһыахха барааччыҥ суох дии... — Барсыаххайыҥ ээ! Кырдьык, биһиги ыал буолуохпутуттан ыла биир да ыһыахха сылдьа иликпит... Чэ, ити хааллын, бүгүн ыһыах күнэ! Бүгүн хайаан да Үс Хатыҥҥа тиийэбит! Сахабын дэнэр киһи олоҕор саатар биирдэ үрүҥ тунах ыһыах түһүлгэтигэр түүйэн, кымыстаах чороонунан айах тутан үрдүк айыыларыгар сүгүрүйүөхтээх, үрүҥ күн алгыһын ылыныахтаах. Дьэ бүгүн баҕас харчыбын хараһыйбакка , кэмчилии сатаабакка, хараҕым сөбүлүү көрбүт күндүттэн күндү симэҕин атыылаһан кэтиэм. Кичэмэтик ууран сытыарбыт ийэм бэлэхтээбит үрүҥ кыл сэлээппэтин хойуу хара суһуоҕум үрдүнэн сэгэччи уурунуом. Халадаай ырбаахым тэлээрбитинэн чэпчэкитик дугунан Үс Хатыҥ түһүлгэтигэр киириэм. Ханнык эрэ чараҥ быыһыгар кэҕэ этэн кэҕийиэ, "өссө да уһуннук олоруоҥ!" диирдии тохтообокко чоргуйуо... Хомуна-тэринэ охсон ыһыахтыыр сир диэки айаннаатыбыт..... Салҕыытын сигэнэн киирэн ааҕыҥ...https://churlib.ru/cholbon-ajar-kyha-byrajyagyn-munutuur-kyajyylaa5a-churapchyttan-torytteeh-sardaana-koryakina-sardaana-buolla/