*Чурапчы ыччатын үлэнэн иитии — сайдыы төрдө*
*Чурапчы ыччатын үлэнэн иитии — сайдыы төрдө* Балаҕан ыйын 7 күнүгэр, айылҕа барахсан көмүс дуйунан симэммит кэмигэр, Чурапчы улууһун үс тумус туттар үөрэҕин кыһата: С.А. Новгородов аатынан Чурапчы орто оскуолата, И.М. Павлов аатынан Чурапчы орто оскуолата уонна С.К. Макаров аатынан Чурапчы гимназията — бэйэлэрин историяларыгар саҥа сырдык сирэйи арыйдылар. Эрчимнээх эдэр көлүөнэ — 10-с кылаас үөрэнээччилэрэ — «Үлэ киһини киэргэтэр» диэн өбүгэбит мындыр этиитин сүрэхтэригэр илдьэ сылдьан, төрөөбүт дойду уйгутун уһансаллар. Чурапчы улууһун дьаһалтатын өйөбүлүнэн, улуус үөрэҕин салалтатын сыллааҕы былаанынан, "Боотур Уус сыдьааннара" муниципальнай бырагыраама иһинэн, холбоһуктаах биригээдэ тэриллэн, хоһуун үлэһит дьон суолунан Мындаҕаайы сиригэр-уотугар туруннулар. Түөрт күн устата кинилэр тыа хаһаайыстыбатын сыралаах үлэтин эттэринэн-хааннарынан билиэхтэрэ. Кинилэр бары индивидуальнай предприниматель Д.Д. Павлов хаһаайыстыбатыгар дуогабар түһэрсэн, үлэһит дьон быһыытынан эппиэтинэһи сүктүлэр. Агро хайысхалаах Р.И.Константинов аатынан Амма орто оскуолатыгар оҕуруот үлэтигэр сылдьыахтара, ону таһынан олохтоохторго тимуровскай көмө оҥорон үлэлиэхтэрэ. Бу үтүө бачыымы өйөөн, улууспут баһылыга С.А.Саргыдаев, үөрэх салалтатын салайааччыта Ю.П.Посельскай, учууталлар уонна төрөппүттэр алгыстарын анаатылар. Эдэр дьон хара үлэҕэ миккиллэн, сомоҕолоһорго, эппиэтинэстээх буоларга — бу буолар XXI үйэ киһитигэр ирдэнэр саамай сыаналаах сатабыла. Чурапчы ыччата — инникигэ эрэллээх! Үлэ-хамнас үөһүгэр сылдьар оҕолорбутугар ситиһиини, чэгиэн доруобуйаны баҕарабыт! Эһиги төрөөбүт дойдугут туһугар угар үлэҕит өлгөм үүнүүнэн, уйгулаах олоҕунан эргиллиэҕэ.