Ĕпхÿ хĕрĕ Çурçĕрти Пăрлă океан патне велосипедпа çитĕ — 9 июля 2026 г. в 05:33:00.669
Ĕпхÿ хĕрĕ Çурçĕрти Пăрлă океан патне велосипедпа çитĕ Ксения Салазанован хăй ĕмĕтленнине пурнăçа кĕртес тесен 2 пин çухрăм тăсăлакан çула кĕскетмелле пулĕ. Ĕпхÿри Ксения Салазанова опытлă велоçулçÿревçĕ Çÿрçĕрти Пăрлă океан енне кайма çула тухнă. Хальхи вăхăтра вăл Бирск хулине çитнĕ. Çул çинче хăюллă хĕр палаткăра е палланă çынсем патĕнче çĕр каçать. Старта Ксения Валериан Альбанов (Арктика тĕпчевçи, çыравçă) ячĕллĕ музей патĕнчен тухнă. Çул çÿревçĕ каласа панă тăрăх, ăна шăпах хамăр ентешĕн историйĕ вăрăм çула тухма, Архангельск облаçĕнчи Çурçĕр Двина хулине çитме хистенĕ. - Тĕп тĕллев - Çурçĕрти Пăрлă океан тăрăхĕнчи илемпе паллашасси тата унти сывлăша сывласа киленесси. Çурçĕре каятăп. Çул тăрăшшĕ 2 пин çухрăма яхăн. Маршрут çинчи вак-тĕвексем çинчен шухăшламастăп, вырăнтан вырăна вăй-хал çитнĕ таран куçма тăрăшăп», - тесе çырнă телеграм-каналта велоçулçÿревçĕ старта тухас умĕн. Каялла Ĕпхĕве Ксения поездпа Вологда хули урлă таврăнма палăртать. Сăмах май, велосипедпа вăрăм çула тухасси Ĕпхÿ хĕрĕшĕн пĕрремĕш хут мар. Иртнĕ çул вăл Сахалин тăрăх 840 çухрăм иртнĕ – утравăн çурçĕр енчен Кăнтăр-Сахалин хулине çитнĕ.