УРАҺАЛААХ АЛААҺЫГАР ҮРҮҤ ТУНАХ ЫҺЫАХТАР БУОЛЛУЛАР — 13 июня 2026 г. в 12:49:15.316
УРАҺАЛААХ АЛААҺЫГАР ҮРҮҤ ТУНАХ ЫҺЫАХТАР БУОЛЛУЛАР Бүгүн, бэс ыйын 11 күнүгэр Майа сэлиэнньэтин Ураһалаах алааһыгар, биһиги улууспут олоҕор сүрүн суолталаах хас да идэлээх тэрилтэ кэлэктииптэрэ үрүҥ тунах ыһыахтары тэрийдилэр. Бу дьоро күҥҥэ Саха дьонун сиэринэн, айылҕалыын алтыһан, кэлэр кэскилбит туһугар алгыс этилиннэ, араас хабааннаах тэрээһиннэр ыытылыннылар. Бу күн нэһилиэнньэ социальнай көмүскэллээх буолуутун биир кэлим киин кэлэктиибэ идэлээх бырааһынньыктарын – Социальнай үлэһит күнүн бэлиэтээтилэр. Ону тэҥэ, улууска суут үлэтин 95 сыллаах үбүлүөйүн эмиэ ыһыах чэрчитинэн өрөгөйдөөтүлэр. Оттон күн-түүн дьон доруобуйатын туһугар үлэлиир мэдэссиинэ үлэһиттэрин кэлэктиибэ- Мэдэссиинэ үлэһитин күнүнэн үөрүүлэрин үллэһиннилэр. Хас биирдии тэрилтэ кэлэктиибин улуус баһылыга Дмитрий Тихонов, бу үбүлүөйдээх уонна идэлээх бырааһынньыктарынан истиҥник эҕэрдэлээн бэлиэтээтэ, улуус сайдыытыгар киллэрэр кылааттарын иһин махтал тылларын эттэ. Ону тэҥэ, улууспут бастыҥ үлэһиттэригэр үрдүк наҕараадалары туттарда. Бу курдук дьоро тэрээһиннэр дьон биир санаанан, күүһүнэн сайдарын, кэлэр кэскили түстүүрүн кэрэһилээтилэр. Улууспут сайдыытын туһугар үлэлиир бары үлэһиттэрин, ытыктабыллаах бэтэрээннэрбитин идэлээх күҥҥүтүнэн, ыһыаҕынан эҕэрдэлиибит! Тус бэйэҕитигэр уонна чугас дьоҥҥутугар дьолу-соргуну, чэгиэн-чэбдик туругу, эйэлээх халлааны, этэҥҥэ буолууну баҕарабыт! Хаартыскалары бу сигэҕэ көрүҥ: https://drive.google.com/drive/folders/1cdWP__Jny_CW6rtC_rFVm72WQZWEM8DM?usp=drive_link Мэҥэ Хаҥалас улууһун дьаһалтатын пресс-сулууспата