Кармасть «Лучший по профессии» пелькстамонь участникекс
Кармасть «Лучший по профессии» пелькстамонь участникекс Мордовиянь Кадровой центрасонть теизь «Лучший по профессии» профессиональной мастерствань коряс Весероссиянь пелькстамонь региональной этапонь цетамотнень. Васенцеде те пелькстамосонть, «Второй старт» номинациясонть, участвовасть специальной военной операциянь ветерантнэ. «Пелькстамось ютавтови «Кадры» национальной проектэнть вельде, сон пек паро. «Второй старт» номинациясь арсезель-теезель сеть ломантнень туртов, кить ванстсть Тиринь масторонть, ней жо велявтсть гражданской эрямонтень ды муизь эсь пряст эрьва кодамо профессиясо, максозельть тенст од содамочить. Те пек эрявикс тев. Мордовиясо улить ламо примерт, зярдо фронтсто сазь ветерантнэ эли панжить эсест тев, эли молить важодеме промышленной предприятияв, эли роботыть тонавтыцякс ды врачокс. Нама, тынь а стувтнетядо патриотической роботадонтькак, вастневтядо од ломантнень марто, ютавттадо «Мужествань урокт», – пшкадсь пелькстыцятненень МР-нь эрицятнень социальной защитань, трудонь ды занятостень министрань васенце полавтыцясь Татьяна Биушкина. Пелькстамонь арсицякс-ютавтыцякс кармась МР-нь Эрицятнень социальной защитань, трудонь ды занятостень министерствась. Мордовиясто СВО-нь ветерантнэнь ютксто «Второй старт» номинациясонть изницякс лиссь «Герои среди СВОих» программань финалистэсь Виталий Ефремов. Сон карми невтеме минек региононть пелькстамонь федеральной этапсонть, конась ютавтови те иень сексня Самарасо. Неень шкасто Виталий Иванович важоди электровозонь машинистэнь лездыцякс. Специальной военной операциясо ульнесь сонзэ ютавтомань васенце читнестэ саезь. «Зярдо сынь кудов, арсинь молемс важодеме полицияв. Ансяк эйкакш порасто саезь ульнесь мелем роботамс чугункань ки лангсо, ветямс поездт. Неень шкасто роботан локомотивтнень марто. Юткошкасто якан «Мужествань уроктнес», школасо тонавтницятненень ды студенттнэнень евтнян фронтсо эрямодонть», – кортась ветеранось.