Лездыть ветерантнэнь ды сынст семияст туртов
Лездыть ветерантнэнь ды сынст семияст туртов Мордовия Республикава «Защитники Отечества» Государственной фондонь социальной координатортнэ поладыть СВО-нь ветерантнэнь ды чавовозь боецтнэнь семиятнень марто адресной роботанть. Лезксэсь явови эрьва чистэ республикань весе районтнэсэ: соцкоординатортнэ ванныть эрьва чинь эрямонть марто сюлмавозь кевкстематнень, лездыть документтнэнь марто ды арсить-пурныть седейоймамонь вастовомат. Кадошкинань районсо Юлия Шарашкина соцкоординаторонть лезксэнзэ вельде Сергей Володиннэнь, боевой действиянь ветеранонтень, максозель учовикс казнесь – «Участник специальной военной операции» медалесь. Ицялонь районсо почетной миссиясь вейсэндинзе фондонть ды тосонь администрациянть. Лариса Ануфриева социальной координаторось вейсэ военной комиссаронть ды велень поселениянь прявтонть марто якасть инжекс СВО-нь ветеранонтень Павел Будиннэнь. Тиринь масторонь ванстыцянтень, конась боевой задачань топавтомсто теевсь инвалидэкс, максызь государственной казненть. Сехте эрявиксэсь жо – те семиятнень туртов юридической лезксэнь максомась. Истя, Рузаевкань районсо Екатерина Лимонникова соцкоординаторось лездась Отечествань ванстыцянть аванстэнь анокстамс зярыя документт. Те лезксэнть вельде авантень куроксто анокстазель-максозель чавовозь ветеранонь семиянь членэнь удостоверения ды истя жо явозельть весе эрявикс пандоматне. Теде башка, эште вейке эрявикс историясь – Владимир Князевнень лезксэнь максомась. Роботамо лисемадо икеле Отечествань ванстыцянтень эрявсь анокстамс эрямо таркань коряс регистрация. Лимонникова соцкоординаторось те кевкстемантькак саизе эсензэ вановт алов. 2026 иень мартонь 30-це чистэ весе документтнэ анокстазельть, ды апрелень васенце читнестэ Владимирэнь стакачивтеме саизь важодеме Ицяло поселкасо «Агросоюз» покш предприятиянтень. Краснослободскоень районга соцкоординаторось Валентина Федюшкина вейсэ ветеранонь райононь советэнь председателенть Юрий Беляков марто якасть инжекс Заречной пансионатсо ветеранонтень-инвалидэнтень Владимир Липилиннэнь. Молемань тувталоськак кенярксоволь – боецэнть чачома чизэль. Поздоровонь евтамодо башка, координаторось кунсолынзе церанть мелявксонзо ды ярмаконь пандоматнень коряс лездась кучомс кевкстема СОГАЗ страховой компаниянтень. Теде башка, покш мель явови сеть ломантнененьгак, кить емавтызь сехте малавикс ломанест. Отяжеле поселкасо Елена Жданкина координаторось пурнась вастовома чавовозь ды кулявтомо емазь геройтнень семиятнень Андрей Первозванный лемсэ храмонь настоятеленть отец Василиень ды духовной психологонть Вероника Копейко марто. Чайде симемстэ кругловой столень лувсо участниктненень максовсть эрявикс кевкстематнень лангс каршо валт ды оймеежонь шождалгавтома. «Мордовиясо «Защитники Отечества» Государственной фондонь филиалонть роботазо поладови седе товгак, – тешкстызе «Защитники Отечества» Госфондонь филиалонь руководителесь Алексей Герасименко. – Минек прявт бажамонок – эрьвантень, кие стясь Тиринь масторонть ванстомо, ды сынст малавикстнэнень лезксэнь ды седейлембень явомась». Фотось «Защитники Отечества» Госфондонть.