Тиринь моданть мазычизэ фотосонзо
Тиринь моданть мазычизэ фотосонзо Кить куш весть ульнесть Орданьбуень Баеньбуе мазый ды кезэрень велесэнть, весе содасызь Андрей Бояркинэнь – фотографонь тевенть вечкицянть, кона бажи кадовомс объективенть тона енов. Самай те сэтьмечись ды сонзэ ерокчись важодевксэнзэ теить седеяк мельстуицякс. Андрей а пани содавиксчинть мельга – сон неи мазычинть тосто, косто лиятненень а неяви. Малавиксэнзэ евтнематнень коряс, Андрей ушодсь снимамо 1990 иестэ, зярдо тензэ ульнесть ансяк 10 иеть. Се шкастонть саезь фотографиясь кармась сонзэ ладсо кортамо мирэнть-масторонть марто. Течи истят ломантнень лемдить «олячинь артыцякс» – аволь дипломонь, а оймень тердемань коряс. Важодевксэнзэ – те ломаненть вановтозо, конась невти эсь тиринь енксонтень вечкеманзо. – Васенце фотоаппаратось понгсь кедезэнь апак фатя. Сестэ, нама, эзинь арсеяк, што седе тов тееви вечкевикс тевекс. Монь покшоль мелем лоткавтомс нурька шканть: вана леенть велькссэ сувось, вана васенце ловось, вана кузтемпесэ сырькаесь… Се шкастонть саезь ютасть колоньгеменде ламо иеть, а мелесь лоткавтомс шканть кадовсь. Мон а лован эсь прям профессиональной фотографокс. Снимсян сень, мезе неян перькан. Мазычись эдь маласо. Монень прась уцяска чачомс Баеньбуесэ – тесэ, тень маряви, лиятнень енов а молиця сэтьмечи, башка валдо. Эрзянь-мокшонь масторось машты дивавтомо, – корты Андрей. Сонзэ важодевкстнэ васенцеде невтезельть 2021 иень сентябрясто. Сестэ райононь Культурань кудосо пурназель фотографиянзо выставкась, конась мольсь малав ков. 2022 иень октябрясто, велень чиденть икеле, Баеньбуень Культурань кудонь важодицятне таго пурнакшность Андрей Бояркинэнь ды Михаил Алтушкин артыцянть «Чачома чи марто, тиринь веле!» тешксэв лементь ало вейсэнь выставка. «Выставкась – аволь ансяк фотографиянь ды артовксонь сюпав коллекция, те тиринь пертьпельксэнть лиятнень енов а молиця мазычинь невтема», – сермадсть сестэ невтемань пурныцятне-теицятне. Кода уш вере сермадынек, Андрей Бояркин сними пертьпельксэнть. Сонзэ кадратне – те паксят ды вирьпулот, тикше лангсо чинь васенце налтнэ... – весе се, мезесь теи эрзянь-мокшонь масторонть оймензэ. Андрейнень те тевесь максы вийть ды кемема эсь прянтень. Теи сонзэ уцяскавокс. Меельце иетнестэ фотографось путни эсь снимканзо «ВКонтакте» социальной сетень лопантень. Кадык Баеньбуестэ фотографось седе товгак полады каземе вадря важодевксэнзэ ломантнень туртов. Яна Зеткина Фототне Андрей БОЯРКИНЭНЬ архивстэ.