Кемемась стясь питнейстэ
Кемемась стясь питнейстэ Мордовиянь эрицясь емавтсь малав 800 тежат целковойть, кемсь налогонь службань ды Госуслугань аволь алкуксонь важодицятненень. Июнень 11-це чистэ Саранск ошонь округка Россиянь УМВД-нь 3-це № ОП-с пшкадсь 23 иесэ тейтерьава, кона яволявтсь сонзэ коряс манчемань тевде. Зыянс понгозенть валонзо коряс, сонензэ гайневтсь налогонь службань важодиця. Кортыцясь пачтясь, тейтересь эзь максо ютазь иенть коряс декларация, секскак тердеви уголовной ответственностес. Кевкстеманть решамга, гайневтицясь кемевтизе сонзэ евтамс кодонть сообщениясто. Апаро тевень теицянтень кемезь, тейтересь евтынзе даннойтнень. Седе тов манчицятне мессенджерсэ сюлмавсть мартонзо буто Госуслугань порталонь ды Центральной Банконь специалисттнэнь пельде, яволявтсть паспортонь даннойтнень саламодо ды манчицятнень бажамодост саемс сонзэ пельде кредитт. Ярмактнень ванстомга эрявсь куроксто ютавтомс сынст безопасной счетс. Манчицятнень кармавтомаст коряс, кавто чинь перть зыянс понгозесь сайсь банксто ярмактнень ды путсь сынст банкоматтнэнь вельде QR-кодтнэнь ды реквизиттнэнь коряс, конатнень кучизь асодавикстнэ. Емавксонь вейсэнь покшолмась – 788 000 целковойть. Мордовия Республикава МВД-сь ледсти: - Илядо кеме асодавикстнэнень. Банконь, полициянь эли государственной ведомствань алкуксонь важодицятне зярдояк а кармить гайневтеме тыненк энялдома марто пачтямс банконь картань весе даннойтнень, CVC/CVV-кодтнэнь эли пачтямотнестэ кодтнэнь. - Бути тыненк гайневтить ды пачтить счетонь акемевикс операциятнеде, тандавтнемадо эли безопасной счетс ярмаконь ютавтомадо эрявиксчиде, сеске путынк трубканть, тынсь гайневтеде банкозонк телефононь номерэнть коряс, конась невтезь картанть удало эли организациянь официальной сайтсо. Илядо кучо ярмактнень. Кодаткак «безопасной счетт» арасть. - Зярдояк илядо путне эсенк телефонс эли компьютерс васолдо совамонь туртов приложеният асодавикстнэнь энялдомаст коряс. Те лезды манчицятненень саемс эсь ванновт алов тынк устройстванть.