Ледстнематне шкадо виевть
Ледстнематне шкадо виевть Мордовия Республикасо, кода весе масторонть келес, июнень 22-це чистэ ютавтовсь Ледстнемань ды ризксэнь чинтень алтазь церемониясь. Те чись кадови масторонь историяс ды ломантнень ледстнематнес, кода сехте нусманятнестэ ды зыяновтнестэ вейкесь. 85 иеде икеле ушодовсь Ине Отечественной войнась, конась сайсь 27 миллионт эрямот. Народонть героической подвигесь свалшкас кадовозо раськетнень ледстнематнес. Мордовиясо чачозь воинтнэнень, конат чавовсть 1941–1945 иетнень Ине Отечественной войнасо, цецянь путомань церемониясонть ульнесь Мордовиянь Прявтось Артем Здунов. Кеврунгонтень цецят истя жо путозельть Мордовиянь Государственной Собраниянть, республикань Правительстванть, ПФО-со РФ-нь Президентэнь полномочной представителень Аппаратонть, Мордовия Республикань Прявтонь ды Мордовия Республикань Правительствань Администрациянть, Саранск ошонь округонь прявтонть, Мордовиянь Митрополиянть, военнослужащейтнень ды правань ванстомань органтнэнь руководительтнень, Россиянь Геройтнень доватнень, общественной, ветеранонь ды военно-патриотической организациятнень, Саранскоень общеобразовательной организациятнень кадеттнэнь ды юнармеецтнэнь пельде. Чатьмонемань минутасо ледстизь весень, кить эсь эрямонь питнесэ топавтызь иневанькс долгонть, ванстызь Тиринь масторонть фашизманть эйстэ. Те калавтыця, кежей ды верень валыця войнадонть ледстнематне, кода а оймавиця ризкс, свалшкас кадовить миллионт солдаттнэнь, конат максызь эрямост сэтьмечинть кисэ, эйкакшост ды нуцькаст седейс. Цецят истя жо путсть специальной военной операциянь геройтнень кеврунгонтень.