«Эрзянь цёков» пелькстамось вейсэндинзе тиринь келень вечкицятнень
«Эрзянь цёков» пелькстамось вейсэндинзе тиринь келень вечкицятнень Аволь умок Ицялонь средней школась панжокшнынзе кенкшензэ эрзянь келентень мельявицятненень. Тосо пурназель «Эрзянь цеков» пелькстамось. Сонзэ арсицятне-ютавтыцятне – школань тонавтыцятне ды Кривошеевтнень лемсэ культурань научно-просветительской куншкакуронь прявтось Анжелика Горбунова. – Те пелькстамось эрьва ие невти кодат минек од ломаненек ероковт ды эсь келест вечкицят. Эрьвась бажи пачтямс тиринь келенть коряс содамочинзэ. Те неяви сеньсэ, кодамо мельспаросо сынь анокстыть пелькстамонтень. Кемлянь, Ицялонь, Рождественскоень ды Смольноень школатнестэ весемезэ пурнавкшнось 11 эйкакш. Эсень пельде мон евтан сюкпря эрьва эйкакшонтень. Арсян, сынь седе товгак поладсызь те тевенть. Сы иестэ те пелькстамонтень учотано од участникть ды инжеть, – тешкстась Анжелика Владимировна. Юля Юдина – Кемлянь школань 6-це классонь тонавтницясь, пелькстамонтень анокстась валморо, конань сермадызе сонсь. Тейтерькась бажась невтемс эйсэнзэ Кемлянть мазычинзэ. Кода мерсть жюринтень совицятне: те мелесь топавтовсь. – «Эрзянь цеков» пелькстамонтень минь сатано колмоцеде ды эрьва самсто дивсетяно эйкакштнень ерокчист кувалма. Валморонь ловномадо башка сынь анокстыть раськень оршамопельтькак. Минь пек кенярдтано, зярдо эйкакштне ловныть эсь стихест. Течияк вана вастынек истямо тейтерька, арсетяно кирдемс мартонзо сюлмот ды лездамс сермадома тевсэнть, – мерсь «Чилисема» журналонь прявт редакторось Елена Барцаева. Эйкакштнеде башка пелькстамосонть валморост ловность тонавтыцятнеяк. Стихотворениятнесэ пек домкасто гайгсь войнань темась. Изницятнень кочкамс а шождаль, эдь эрьва ловномасонть марявсь тиринь масторонтень ды келентень вечкемась. Жюринтень совицятне – «Чилисема» журналонь прявт редакторось Е. Барцаева, А.С. Пушкин лемсэ библиотекань раськень ды краеведениянь литературань отделэнь прявт библиотекаресь В. Бояркина ды «Навигаторы детства» проектэнть координаторось Е. Названова, эйкакштненень казсть дипломт ды казнеть. Изницятнень каземадо мейле Римма Жегалина – эрзянь келень ванстыцясь ды вечкицясь, ютавтсь валморонь ловномань коряс мастер-класс. Римма Дмитриевна те пелькстамодонть мерсь: – Ицялонь школасонть а ветяви эрзянь келесь, секскак а весе чарькодить, кода парсте ловномс валморотнень. Косто-косто колави ритмась эли а видестэ евтави валось. Мон анокстынь зярыя правила марто апокш материал. Правилатнень ютамодо мейле эрзякс ды рузокс ловнынек валморот, морынек морот. Сюкпря М.И. Четвергованень, конась вети те школасонть эрзянь кружок. «Эрзянь цеков» пелькстамось прядовсь гайтев цяпамосо ды лембе валсо пелькстыцятненень, арсицятненень ды топавтыцятненень. И.П. Кривошеев важодсь Ицял буень школасо 25 иеть ды пек кенярдовты, сонзэ лемензэ а стувтнить. Яна Кудашкина