✅❗💯Тиринь келесь ды неень шкань технологиятне
✅❗💯Тиринь келесь ды неень шкань технологиятне Кода ванстомс тиринь келенть сюпавчинзэ цифровой технологиятнень шкасто? Кодат кить-янт панжи интернет-пространствась культурань сюпавчитнень тонавтнеманть туртов? Ды кода тонавтомань неень шкань технологиятне лездыть вейсэндямс койтнень ды инновациятнень? Октябрянь 22-це чистэ М.Е. Евсевьев лемсэ МГПУ-со ютавтовсь «Тиринь келесь ды культурась цифровой масторсонть» студенттнэнь ды школьниктнень раськеютконь III-це научно-практической конференциясь. Конференциянь прявт тевесь – кевкстематнень ванномась, конатне сюлмавозь тонавтнемань цифровой тевтнень, тиринь келень ды культурань енкссонть цифровой технологиятнень тевс нолдамонть марто. Конференциянть важодемасо ульнесть ученойтне, аспиранттнэ, студенттнэ, важодема таркань максыцятне, Российской Федерациянь школатнесэ тонавтыцятне ды тонавтницятне. М.Е. Евсевьев лемсэ МГПУ-нь ректоронть Марина Владимировна Антоновань пельде пурнавозтненень шумбракстнемань валт евтась педагогической университетэнь научной ды инновационной роботань коряс проректорось, филологиянь наукань докторось, профессорось О.И. Налдеева. Сон тешкстызе, течи цифровой технологиятне кармасть тонавтнемань енкссонть прявт пельксэкс. – Течи минь пурнавинек, штобу толковамс раськень культурань, тиринь келень ванстомань талновтыця кевстематнеде. Тиринь келесь – те раськенть оймезэ, сонзэ исторической памятезэ ды поколениятнень ютксо сюлмо. Минек университетэсь свал яви башка мель гуманитарной исследованиятненень, седеяк пек тиринь келень ды литературань енкссонть, – мерсь Ольга Ивановна. Истя жо Ольга Налдеева тешкстызе, течинь промкссонть ловнозь докладтнэ, евтазь мельтне-арсематне теить покш путовкс тиринь келенть ды культуранть виевгавтомантень. Пленарной промксонть важодемасо кортасть Мордовской государственной педагогической университетэнь тиринь келень ды литературань кафедрань аспирантось, Саранск ошонь 5-це № школань мокшонь келень, рузонь келень ды литературань тонавтыцясь Кирилл Шишканов, сон ловнызе «Современные информационно-коммуникационные технологии в деятельности учителя родного (мокшанского) языка» докладонть; М.Е. Евсевьев лемсэ МГПУ-нь аспирантось Цэя Жуйтцин кортась «Особенности художественной репрезентации образа звезды в лирике С.А. Есенина: цифровое исследование» теманть коряс. Конференциянть юрсо пурназельть научной вете площадкат, конатнень важодемань прявт енксокс кармасть цифровой тонавтнемань сферасонть тиринь, теке марто рузонь, келенть ды литературанть касомань-виевгавтомань мелявкстнэ, Интернетсэ сынст тевс нолдамось. Эряви тешкстамс, педагогической университетэнь студенттнэ свал примсить участия научной конференциятнесэ ды невтить эсь ерокчинть цифровой технологиятнень тевс нолдамонь енкссонть.