Рамавксось эзь учово
Рамавксось эзь учово Малав 3 миллионт целковойть манчицятненень ютавтсь Саранскоень эрицясь, кона арсесь рамамс Германиясто автомобиль. Июнень 18-це чистэ Саранск ошонь округка Россиянь УМВД-нь 3 № ОП-с пшкадсь тесэнь 38 иесэ эриця, кона пачтясь кедьстэнзэ 2 миллионт 760 тежадо ламо целковойтнень манямодо. Кода евтнесь зыянс понгозесь, июненть ушодовомсто сон несь автомобилень миемадо реклама. Ссылкаванть ютамодо мейле, зыянс понгозесь совась группас, косо ульнесть эрьва кодат яволявтомат Германиясто иномаркатнень панемадо. Церась сермадсь менеджерэнтень, келя, ули мелезэ рамамс «Мазда СХ-5» автомобиль, конань питнезэ 1 миллион 450 тежат целковойть. Ладямонть коряс ярмактнень кучомальть зярыяксть пандомасо. Теде мейле зыянс понгозентень кучозельть договор ды счетонь реквизитт, конатнень коряс сон ютавтсь 470 тежат целковойть таможнянь пошлинань пандомакс автомобиленть кисэ, конась ашти Беларусь Республикань границясо. Омбоце чистэ церась ютавтсь эште 918 тежат целковойть таможнянть пачк автомобиленть ютамонзо кисэ. Зярыя часонь ютазь зыянс понгозенть марто таго сюлмавсь менеджерэсь ды пачтясь, эряви пандомс 713 тежат целковоень покшолмасо залог, тень пингстэ а содавикс ломанесь алтась, келя, ярмактне сонензэ велявтовить Беларусь Республикань ды Российской Федерациянь транзитэнь ды границянь ютамонь весе процедуратнень прядовомадо мейле. Эште зярыя чинь ютазь электронной ПТС-нть, автомобиленть лангс сопровождающей документтнэнь анокстамонть ды вейкине госпошлинань пандоманть кувалма Саранскоень эрицясь ютавтсь манчицятненень эште 600 тежадо ламо целковойть. Финансонь меельце операциянть ютавтомадо мейле менеджертнэ лоткасть гайневтематнень лангс каршо валонь максомо ды нардызь весе пачтямотнень. Зыянс понгозесь жо пшкадсь полицияв. Неень шкане манчемань коряс панжозь уголовной тев. Мордовия Республикава МВД-сь ледсти: товаронть кисэ ярмактнень пандомадо икеле домкасто ваннынк яволявтоманть, ваннынк сонзэ путыця ломанденть информациянть. Бути микшнемань площадканть ули микшницятнень рейтингень системазо, ваннынк отзывтнень, конатнень кадызь лия рамсицятне, нолдынк тевс интернет-вешнеманть. Лиясто саты совавтомс вешнемань формас микшницянть телефононь номерэнзэ эли сетевой псевдонимензэ сень кисэ, штобу редямс, што неть даннойтне уш тевс нолдавсть ярмаконь саламга ды рамсицятнень манчемга.