Бажи невтемс раськензэ сюпавчинть✅🍀🌺
Бажи невтемс раськензэ сюпавчинть✅🍀🌺 Анна Кустова – РФ-нь Финнэнь-угрань раськетнень од ломанень ассоциациянтень совиця, этноблогер. Сон чачсь Пермской енксонь а покш велинесэ. Школанть прядомадо мейле поладызе тонавтнеманзо Ижевск ошонь государственной университетсэ филологиянь, финно-угроведениянь ды журналистэнь енкстнэнь коряс. Ниле иеть тонавтнесь филологиянь дисциплинатнень, ламо мель явсь удмуртонь ды венгрань кельтненень. Тонавтнема шкасто примась участия раськень промкстнэсэ. Ульнесь Карелиясо, Саранскойсэ, Йошкар-Оласо. Самай сестэ тейтерьсэнть кармась чачомо эсь культурантень вечкемаськак ды ульнесь мель теемс мезеяк эсь раськенть туртов. Шкань ютазь тейтересь «ВКонтакте» социальной сетьсэ ушодсь ветямо «Глазами финно-угроведа. Анна Кустова» этноблог. – Икеле мон аволь пек вечкилия те тевенть. Арасель мелем невтемс эсь эрямом лия ломантненень. Мейле жо карминь путнеме фотот, видеот, аволь покш клипт сеть покш читнестэ, косо ульнинь. Ломантненень те вечкевсь. Вана истя теевинь блогерэкскак. Лементь лангсо арсинь аволь кувать, мон лован эсь прям од финно-угроведэкс ды те лементь коряс аштян каштанчисэ. Монь блогонтень кавто иеть, неень шкане тосо лововить 750 сермадстыцят, нама, те аволь ламо, ялатеке эрьвантень евтан сюкпря улемаст кис. Аволь умок изнинь блогертнэнь ютксо «Блог-тур» пелькстамосонть. Мон пек кенярдынь, зярдо понгинь тов. Те пек паро тарка ушодыця блогертнэнь туртов, – евтнесь тейтересь. Тонавтнема шкасто Анна сермадсь «Красота Приволжья» од ломантнень туртов проект. Сон ютась кавто этапсо, васня ловновсть филологиянь коряс лекцият, седе тов фестивалень участниктне вастовсть Удмуртиянь ероков эйкакштнень туртов куншкакуросонть, косо участниктне колмо чинь перть важодсть филологиянь коряс проекттнэнь лангсо. – Эрямом сюпав эрьва кодамо тевсэ, мон тенень пек кенярдан. Арсян, лия од ломантнеяк, монь лангс ванозь, истя жо кармить явомо мель тиринь культурань ванстомантень-виевгавтомантень. Седе товгак карман поладомо вечкевикс тевем, – корты Аня. Неень шкасто тейтересь важоди Удмуртиянь Раськетнень ояксчинь кудосо. Ютазь иестэ важодиця ялганзо марто анокстасть ды ютавтсть зярыя кенярксчить. Яна Кудашкина Фотось саезь Анна Кустовань архивстэ.