СВО-нь ветеранось Александр Горюнов вастневсь эйкакштнень марто

СВО-нь ветеранось Александр Горюнов вастневсь эйкакштнень марто Республикасонок прядовсь «Служу Отечеству» весероссиянь просветительской акциясь, конась алтазель од ломантнень патриотической лувсо кастомантень. Сонзэ ютавтыцякс ульнесть «Защитники Отечества» Государственной фондось ды «Знание» Россиянь вейсэндявксось. СВО-нь ветерантнэ ютавтсть школасо тонавтницятнень, лагерьсэ оймсицятнень марто вастовомат, сынь мольсть весе Россиянть келес. Неть читнестэ меельце лекция ульнесь «Лесная сказка» санаториясо, тов сакшнось спецоперациянь ветеранось, «Герои среди СВОих» региононь программань финалистэсь, «Защитники Отечества» Госфондонь филиалонь прявтонь полавтыцясь Александр Горюнов. Александр якстере диплом марто прядызе «правоведение» специальностень коряс Саранскоень промышленно-экономической колледженть. Явсь покш мель биатлононтень, ули спортонь мастерэнь кандидатонь разрядозо, нилексть лиснесь Россиянь первенствань призерокс. Армиядо мейле Александр Горюнов кармась служамо региононь Росгвардиянь СОБР-со. Ютызе кинть рядовой снайперстэ саезь отделениянь прявтокс. Боевой задачань топавтомо якась Северо-Кавказской регионов. 2022 иень мартсто саезь топавтсь тевть специальной военной операциянь зонасо. СВО-в ульнесть вете командировканзо, конат ютасть Харьковской, Луганской ды Донецкой енкстнэсэ. Казезь «За Отвагу» ды «За отличие в охране общественного порядка» медальтнесэ. Сон – полициянь майор. Эйкакштнень марто вастовомсто Александр евтнесь службадонзо, макссь каршо валт кевкстематнень лангс. – Зярдо ванан сельмезэнк, неян минек масторонь сы шканть. Содадо, сехте виев оружиясь – те аволь автомат ды аволь снайперэнь винтовка, те – тынк пельде тиринь масторонть вечкемась, вейсэ улемась, ялгатненень лездамось. Тосо, кода кортыть, «ленточка удало», минь вансттано тынк – эрявлиде сэтьме менель ало. Тонавтнеде, яводо мель спортонтень ды касодо Россиянь алкуксонь ломанекс!