Ванстодо тиринь культуранть
Ванстодо тиринь культуранть Софья Крутованень 19 иеть, тейтересь чачсь-кассь Сызраньсэ. Неень шкасто сон тонавтни Самарань государственной экономической университетсэ «юриспруденция» специальностенть коряс. Теде башка, тензэ максови омбоце высшей образования Самарань государственной социально-педагогической университетсэ «Преподаватель истории и обществознания» программанть вельде. Вишка пингестэ саезь Соня явсь мель эстрадань киштемантень. Коллективенть марто ардтнесть Россиянь оштнева. Тень кувалма тейтеренть улить зярыя «Гран-принь» казнензэ. – Эйкакшчистэ саезь эрзянь келесь ульнесь тень малавикс. Авань ендо сырькаем ды покштям сеедьстэ кортнесть эсь ютковаст те мазый ды гайтев кельсэнть. Зярдо кизна сакшнынь велев, тосо кияк эзь корта рузкс. Секскак ульнесь мелем тонавтнемс чарькодеме ды эйсэнзэ кортамо. Сырькаем ды покштям эште тонавтсть эйсэнь, кода эряви ванстомс ды вечкемс эсь тиринь келенть. Велесэ ютавтозь сеть читнень ней ледстнян мельспаросо, тень кис евтан сюкпря малавиксэнь туртов, – корты Софья. Эрзянь келентень, раськентень вечкемась чопавтизе тейтеренть эсь областень финнэнь-угрань культуранть виевгавтомань тевентень. Сонянь аванзо, Юлия Федоровнань, Сызраньсэ ули «Нармонь морыця» ансамблязо. Сынст репертуарсо эрзянь ды мокшонь морот. – «Нармонь морыця» ансамблясь ломантненень кази ютазь иетнень сюпавчинть, невти мокшэрзянь культуранть мазычинзэ. Мон пек кенярдынь, зярдо тердимизь мартост морсеме. Сеедьстэ морсян ошонь эрьва кодамо мероприятиятнесэ. 2025 иень ноябрясто Саранскойсэ молиця финнэнь-угрань раськетнень форумсо кочкимизь Самарань областень представителекс. Кругловой стольсэ важодемань цетамотнесэ кемекстазель мель – Российской Федерациянь Финнэнь-угрань раськетнень ассоциациянтень монь совавтомадо. Кода Ассоциациянтень совиця, мон бажан келень ванстомантень ды локальной ушодкстнэнень лездамонтень. Эдь Самарань областьсэ эрить 70 тежадо ламо финнэнь-угрань раськеть (эрзят, мокшот, марить, эстонецт ды лият). Целанек монь тевенть смустезэ сеньсэ: сюлмамс кезэрень койтнень-кирдатнень неень шкань технологиятнень ды креативной таркатнень марто, явовтомс од ломантнень мелест ютазь шкань культуранть, келенть вельмевтемантень ды ванстомантень. Арсематнеде ламо, улевель бу пек паро, бути сынь топавтовольть. Софья Крутова соды: те тевсэнть, нама, васняяк эстензэ эряви улемс примерэкс, лангозонзо ванозь, вейсэндявить лиятнеяк. – Од ломантненень эряви ванстомс тиринь кельтнень. Эсь культурантень лездамонть вельде ломанесь сонськак кастсынзе эсь содамочинзэ. Монь туртов эрзянь келесь – те сюлмо ундокстнэнь марто. Мон, тетям-авам, покштям-бабам – весе минь сюлмазь а неявикс суринесэ, конась вейсэнди эйсэнек, максы вий ды икелев молема ки. Прявт бажамом – паморькскень паморькс пурнамс весементь, мезе кадсь тенек сыре поколениясь, маштомс сонзэ ванстомс ды седе тов пачтямс эйкакшон туртов. Яна Зеткина