🌿🌿🌿Течи А.И. Полежаев лемсэ музеень «Литературань гостинойсэ» ютась лембе вастовома,...
🌿🌿🌿Течи А.И. Полежаев лемсэ музеень «Литературань гостинойсэ» ютась лембе вастовома, кона алтавсь МАССР-нь заслуженной ды народной писателенть Андрей Дмитриевич Куторкинэнь чачома чистэ саезь 120 иетненень. Паро вал марто пурнавозтненень пшкадсь МР-нь Журналистэнь союзонь прявтось Людмила Резяпкина. Сон – Куторкинэнь роднязо-раськезэ. Вана уш зяроце ие Куторкинтнэнь семиясь ютавты писателенть ледстнемга литературань пелькстамо. Нейгак яволявтозельть конкурсонь изницятнень лемест. Пелькстамонтень кучозельть 30-де ламо важодевкст. Тенень явсть мель писательтне, журналисттнэ, общественной деятельтне. Ютксост минек газетань специальной корреспондентэсь Татьяна Маторкина. Казевсть весе. Писателенть эрямонь ды творческой кидензэ паро кортамо анокстась А.С. Пушкин лемсэ библиотекань раськень ды краеведениянь литературань отделэнь прявтось Надежда Бочканова. Сынст библиотекасо ванстовить авторонть весе книганзо. МР-нь центральной государственной архивень отделэнь прявтось Наталья Терешкина евтнесь седе, мезе ванстови фондсост: Куторкинэнь рукописензэ, документэнзэ. Паро казнекс кармась Татьяна ды Федор Владимировтнень дуэтэнь морамось.