«Лембе мизолкстнэ» эждить седей🌸🌸🌸
«Лембе мизолкстнэ» эждить седей🌸🌸🌸 А. С. Пушкин лемсэ библиотекасо ютась пек паро вастовома – Марина Агафоновань (Слугинань) книгань презентациясь. «Лембе мизолкст» – истямо мазый лем кандтни сонзэ омбоце книгась. Тей совасть тиринь веледе, эрзянь кельде, неень шкань эрямодонть стихтне, рузонь содавикс поэттнэнь стихест ютавтовкстнэ. Сынь сермадозь меельце вете иетнень перть. – Маринань содаса умок, сон ульнесь монь студенткакс ды аспиранткакс. Сон важодсь телевидениясо, школасо, газетасо, ней – журналсо. Окойники, кармась явомо покш мель литературантень, конась тензэ пек малавикс. Сонзэ поэзиясь лия енов а молиця. Авторось тевс нолды пеедькшнемань жанранть. Парсте реди ломантнень ды минек эрямонь асатыкстнэнь, невти сынст маштозь ды тевень содазь, невти паро ды берянь енкстнэнь. Аволь эрьвась истя машты. Произведениятнень ловномсто пейдят ды арсят весементь лангсо. Башка валт евтавлинь «В мире творчества Петра Рябова» книгадонть, ков совасть М. Слугинань стихензэ. Те – неень шкань лия енов а молиця издания, питней, вадря. Эрьва скульптуранть лангс сон арсесь стих. Койсэнь, книгась-альбомось лиссь лезэв, эрявикс. Касты тиринь келентень вечкеманть. Минек литературась седеяк сюпалгадсь неть кавто книгатнесэ, – кортась содавикс литературоведэсь А.М. Каторова. Седе, кода вейсэ важодсть телевидениясо, ледстнесь Эрзянь ды мокшонь раськень регионъютконь исполкомонь прявтось Т.И. Ларина. Сон тешкстызе, кода сюжеттнэнь теемстэ Марина тевс нолдась творческой весе маштомачинзэ ды телеважодевксэнзэ явовсть лиятнень эйстэ. Лембе валт евтась «Сятко» журналонь прявт редакторось Л.А. Ломшина. Маринань марто сынь умок содавикст, университетсэ тонавтнесть ве шкасто, эрястькак вейсэ, ней вейсэ важодить. Валонзо коряс, Марина – тевде а пелиця, сеске кунды заданиянь топавтомо, мезе аволь истя – весементь евты сельмес, чарькоди критиканть, а саи кеж. Мезесь токасы оймензэ – куроксто сермадсы конев лангс. Паронь арсемат евтасть МР-нь Писателень союзонь прявтось Т.П. Швецова, МР-нь заслуженной поэтэсь Г.С. Гребенцов, чувтосто керсицясь П.В. Рябов. Моронь казнеть алтасть МР-нь заслуженной артисткась Елена Воронина, «Ламзурь» фольклорной ансамблянь морыцятне. Те вастовомасонть инжетне мельспаросо ловность Марина Слугинань стихензэ, баснянзо. Николай Карпов гитара марто морызе «Симницясь ды сеясь» стихензэ лангс моронть. Весе седейстэ арсетяно Маринанень творчествасо келей ки, ламо изнявкст, икелев молемань тевть. Татьяна Маторкина