⚡⚡⚡Кундызь зыянов тевень теицятненень лездыцянть
⚡⚡⚡Кундызь зыянов тевень теицятненень лездыцянть Саранск ошка Россиянь УМВД-нь 3 № ОП-нь дежурной частев пшкадсь 76 иесэ пенсионеркась, конась пачтясь ламо ярмаконзо саламодо. Зыянс понгозенть валонзо коряс, телефонозонзо гайневтсь а содавикс ломань, конась евтызе прянзо Соцфондонь роботникекс ды мерсь, келя, эряви одс ловомс аванть пенсиянзо. Тень туртов евтамат паспортонь даннойтнень. Теде мейле пенсионерканть марто сюлмавсь буто ФСБ-нь сотрудник, конась пачтясь, келя, ансяк тензэ гайневтсть мошенникть ды сон тейсь а видестэ, паспортонь даннойтнень а эрявольть максомс, эдь ней, секень вант, илязо лисе истя, што авась лездась террористэнь организациянтень. Аванть марто телефонга кортыцясь кармавтызе саемс весе ярмактнень ды максомс ФСБ-нь представителентень декларированиянть теемга. Пенсионеркась банксто саинзе 1 миллион 700 тежат целковоензэ ды кармась учомо курьерэнть. Окойники учовсь! Чокшне тензэ сась а содавикс ломань, ды зыянс понгозесь максынзе чондатнень, конатнень алтасть тензэ велявтомс кой-зяро чинь ютазь. Нама, эзть учово, савсь пшкадемс лезкс мельга полицияв. Вешнемань мероприятиятнень ютавтомсто МВД-нь региональной Уголовной розыскень управлениянь сотрудниктне ливтизь лангс – мошенничествань тевсэнть сюлмавозь Казанень 66 иесэ эрицясь, конань кундызь Ульяновской областьсэ истямо ж о тевенть теемстэ. Кевкстнемстэнзэ церась видькстась зыянов тевень теемасонть. Сон пачтясь, келя, курьерэнь роботанть муизе Интернетстэ. Сонензэ эрявсь сайнемс ярмактнень пенсионертнэнь кедьстэ ды кучомс евтазь телефонганть. Меельце зыянов тевенть теемстэ курьерэсь кундазель.