Тиринь школасо вастовома
Тиринь школасо вастовома Саранскоень 22-це № школасо ютавтовсь «Мужествань урок». Инжекс ульнесь те школань прядыцясь, СВО-нь ветеранось, прапорщикесь Виктор Куликов. Мероприятиясь анокстазель Мордовия Республикава «Защитники Отечества» Государственной фондонь филиалонть ушодксонзо коряс. Виктор чачсь Саранскойсэ, 22-це № школанть прядызе 2010 иестэ. Эйкакш пингестэ саезь сон арсесь улемс военноекс. Анокстась профессиянтень пек парсте: явсь мель самбонтень ды каратэнтень, якась пулевой леднемань секцияв, парашютонь клубов – весементь тейсь сень туртов, штобу понгомс Рязанень десантной военной училищав тонавтнеме. Сестэ те эзь удала, ды Виктор кармась тонавтнеме педагогической институтсо историянь ды правань факультетсэ. Ансяк иень ютазь сайсь академической отпуск ды тусь армияв. Службазо ушодовсь воздушно-десантной войскатнесэ, разведывательной ротасо. Свалшкань леднемат, парашют марто кирнявтнемат – весе те кармась сонзэ туртов аволь ансяк армиякс, эрямонь алкуксонь школакс. Армиядо мейле Виктор кармась важодеме МВД-сэ, ОМОН-со, косо служась 10 иеть. Те шканть перть сон ветексть ардтнесь служебной командировкав Северо-Кавказской регионов, Крым Республикав, истя жо ульнесь СВО-нь таркасонть. Службанть ютамсто Виктор явсь мель музыкантень – сонсь сермады стихть ды морот. Репертуарсонзо уш сядодо ламо композицият. 2022 иестэ Виктор кадызе ОМОН-со службанть ды кармась важодеме контрактонь коряс ФСБ-нь пограничной органтнэсэ. Службась мольсь Кавказонь пограничной районтнэсэ. Сонзэ ютамсто ульнесть эште кавто командировкат государственной границянь россиянь-украинань участкав, Курской областев. 2024 иень октябрянь 15-це чистэ сон ранязель. Сонзэ пачтизь курской госпитальс, косо сеске тейсть зярыя операцият, теде мейле ускизь Московонь областев, косо ютавтсть эште вете операцият. Малавиксэнзэ ды ялганзо лезксэст вельде Виктор печтизе те стака кинть. 2026 иень июльстэ лавшо шумбрачинзэ кувалма прядызе службанзо. Службань шкасто Виктор Куликов казезь «За охрану государственной границы» государственной медальсэ. Тонавтницятненень пшкадемстэ Виктор тешкстызе истят вастовоматнень эрявиксчинть: «Арсян, од ломантнень марто истят кортамотне пек эрявикст эрямонь виде енкстнэнь кемекстамонть туртов. Мон эсь кинть кочкия чарькодезь, эште школасо тонавтнемстэ бажинь улемс военноекс. Ды ранявомадо мейлеяк, бути велявтомс шканть удалов, мон ялатеке кочкавлия те кинть. Мон аштян каштанчисэ сень кувалма, што савсь служамс элитной подразделениятнесэ». Те вастовомась эйкакштнень туртов кармась аволь ансяк урококс, истя мужествань, кемечинь ды эсь призваниянтень кемемань невтевксэкс.