Максови лезкс геройтненень ды сынст семиятненень
Максови лезкс геройтненень ды сынст семиятненень МР-ва «Защитники Отечества» Госфондонь филиалонь социальной координатортнэ эрьва чи топавтыть ламо тевть, эрьва мейсэ лездыть СВО-нь ветерантнэнень ды чавовозтнень семиятненень. Сынст важодемаст – аволь ансяк консультацият, покш лезкс стака тевтнесэяк: документтнэнь одс теемась, заслуженной наградатнень максомась. Саранскойсэ социальной координаторонть Наталья Денисовань лезксэнзэ вельде СВО-со чавовозь участникенть аванстэнь максозель церанзо Виталий Разживинэнь Мужествань орденэсь. Наградась максозель ламо документтнэнь марто важодемадонть мейле. Соцкоординаторось Алена Козина лездась СВО-нь ветеранонтень Андрей Мешковнень, сонензэ максозель боевой действиянь ветеранонь удостоверениясь, войсковой частенть марто кортамотне мольсть вейксэ ковонь перть. Ицялбуесэ социальной координаторось Лариса Ануфриева лезды ветерантнэнень ютамс диспансеризация ды медосмотрат – кода поликлиникасо, истя кудосояк. Сонзэ лезксэнзэ вельде диспансеризация ютась боевой действиянь ветеранось, I-це группань инвалидэсь Валерий Бойко – Ицялонь больницянь специалисттнэ якасть тензэ кудос, ванкшнызь, пурнасть анализт, военнослужащеенть марто кортнесь психолог. Истя жо Павел Будин ютась водителень удостоверениянь максомга медкомиссия, Василий Князькин – важодема таркав молемадо икеле медосмотра. «Защитники Отечества» Государственной фондось теезь Россиянь Президентэнть Владимир Путинэнь Указонзо коряс. Сонзэ прявт тевекс ашти СВО-нь ветерантнэнень ды геройтнень семиятненень лездамось. Фондонь специалисттнэ ды социальной координатортнэ лездыть медицинской ды социальной реабилитациянь коряс, одс тонавтнемасо ды важодема таркань муемасо, витнить кудотнень, косо эрить инвалидтнэ. Фондонть вети РФ-нь Оборонань министрань полавтыцясь – статс-секретаресь Анна Цивилева. Филиалтнэ важодить Россиянь весе регионтнэсэ.