Кенярксов куля
Кенярксов куля Кода пачтинек «Эрзянь правда» газетань васенце лопасонть, РФ-нь Президентэсь Владимир Путин кемекстась Указ масторонь оштненень «Трудонь доблестень ош» лементь максомадо. 1941–1945 иетнень Ине Отечественной войнасо Изнямонть саемасо эрицятнень путовксост кис «Трудонь доблестень ош» почетонь лемесь максозь Саранскоентеньгак. Минек республикасо эрить ламо ломанть, кить эрямост алтызь Мордовиянть виевгавтомантень, Ине Отечественной войнадо мейле промышленностенть, строительстванть, велень хозяйстванть кепедемантень-вельмевтемантень. Те кенярксов кулянть коряс минек ловныцятне евтыть мелест: Валентина Никитична САМАРОВА, МАССР-нь заслуженной строителесь, Трудовой Якстере Знамянь орденэнь кавксть кавалерэсь, Раськетнень Ояксчинь орденэнь кавалерэсь, Славань колмонест степентнень ордентнэнь кавалерэсь, РФ-нь од ломантнень заслуженной наставникесь, Саранск ошонь ды Мордовия Республикань Почетной гражданинэсь: – Покш кенярксчисэ вастыя Саранскоентень «Трудонь доблестень ош» почетонь лементь максомадо паро кулянть. Мельспаросан РФ-нь Президентэнть пельде Мордовиянтень истямо покш мелень явоманть коряс. Монь туртов пек малавикст строямонь тевтне, эдь тенень алтыя весе эрямом. Кодгеменде ламо иеть топавтынь те а шожда тевенть, эйстэст ниленьгемень иень перть ульнинь каменщикень бригадирэкс. Ялгатнень марто вейсэ Саранскойсэ стявтынек истят покш предприятиятнень, кода: «Электровыпрямитель», «Литейной», «Приборостроительной», «Орбита», «Медпрепаратт» ды лия заводтнэнь. Строинек эрямо кудот Полежаевень, Большевистской, Татьяна Бибинань лемсэ куротнесэ, школат ды эйдень кужот Зубова Полянань, Краснослободскоень, Рузаевкань районтнэсэ. Истя жо лездынек теемс од эрямо таркат эрицятненень пожаронь лисемадо мейле. Минек бригадась важодсь Мордовиянь кавксо храмтнень мазылгавтомасо. Койсэнь, почетонь лемесь Саранскоентень максозь видестэ, ды икелепелевгак масторонь прявттнэ кармить редямо Мордовиянь паро тевтнень. Василий Федорович ЗАХАРКИН, войнань шкань эйкакшось, трудонь ветеранось: – Пек паро куля сась Мордовиянь весе эрицятнень туртов Саранск ошонтень «Трудовой доблестень ош» почетонь лементь максоманзо коряс. Мон чачинь Ине Отечественной войнанть ушодовомсто, 1941 иестэ, Чаунзань райононь Вишка Маризь велесэ ламо эйкакшонь триця семиясо. Се шкане эйстэнек ульнесть кавксо ломанть. Тетянь, Федор Захаркинэнь, ды Николай лелянь саизь куроксто фронтов. Сынь кавонест маштовсть ятонть каршо тюремстэ. Пек стакаль минек трямс-кастомс аванень, Елена Федоровнанень, ды Настя патянень, кинень се шкасто ульнесть 18 иеть. Самай сестэ сонзэ кучизь Сурань оборонительной рубеженть тееме, аванок жо кадовсь колмо эйкакш марто ськамонзо. Войнадо мейле, 1948 иестэ, молинь школав. Сонзэ прядомадо мейле тонавтнинь Саранскоень 2 № СУ-со, теде мейле карминь улеме кшнинь конструкциянь ветеце разрядонь монтажникекс. Савкшнось важодемс «Волгастальконструкция» трестэнть УНР-468 организациясонть. Тевесь ульнесь эрявикс, косо ансяк эзь саво невтемс эсь содамочитнень: важодинь республикань ламо заводтнэнь ды производственной цехтнень одкстомтомасо. 1975 иестэ тердимизь важодеме Саранскоень автосамосвальной заводов, косо карминь топавтомо главной инженерэнь-строителень тевенть. 2001 иестэ, пенсияв лисемадо мейлеяк, эзинь ойма, ков сатыть вийтне, лездан те шкас Саранск ошонь Октябрьской райононь Ветеранонь организациянтень. Вейсэ ялгатнень марто малавгавттано Изнямонь чинть – лездатано специальной военной операциянь участниктненень. Неень шкане вейсэ прявтонок Наталья Викторовна Макарова марто ютавттано ламо эрьва кодат мероприятият, конат витить сыре ломантнень ежомарямост ды казить кеняркс сетненень, кить пек учить. Минек ветеранонь организациясь покш мельспаросо вастызе те паро кулянть.