Казизь «сиянь» волонтёртнэнь

Казизь «сиянь» волонтёртнэнь МР-нь Народной фронтонь исполкомсо ютась вастовома, конась алтавсь Сыре ломанень чинтень. Тесэ казизь «сиянь» волонтертнэнь, конат максыть покш лезкс СВО-нь участниктненень. Активисттнэнень благодарностть явшесь МР-ва Народной фронтонь региононь исполкомонь ветицясь Людмила Резяпкина. – Республикань келес весе «сиянь» волонтертнэ вейсэндявсть вейке тевс – фронтонтень лездамос. Сынь кодыть кекшемань сетть, теить маскировочной костюмт, коське ямт, кодыть носкат, пурныть гуманитарной лезкс. Тень теить весе седейстэ. Сехте покш наградась тенст – чарькодемс, тевест юты аволь стяко, сынь ванстыть минек цератнень шумбрачист ды эрямост. Сюкпря паро тевенк ды лембе седеенк кис! – кортась Людмила Николаевна. Народной фронтонть пельде казевсть волонтеронь кавто покш куротне – «Z-сети Мордовия» (ветицясь Наталья Сапунова) ды «По зову сердца» (ветицясь Юлия Фадеева). – Мон ламо иеть роботынь стака производствасо, ней пенсиясан. Весть, ошка ютамсто, Соборной площадьсэ неинь, кода аватне кодасть алтымат. Сынь тердимизь моньгак. Се шкастонть саезь мон волонтеронь куросонть, теевинек вейке покш семиякс, – пачтясь Анна Ивановна Сураева. Авась кодась малав сядо алтымат! МР-ва Народной фронтонть пельде благодарностьсэ казевсть Тамара Ивановна Козина, Зоя Ивановна Мягкова, Людмила Николаевна Филимонова ды Людмила Ильинична Макарова. Людмила Ильинична весень ютксто сехте сыресь, ноябрянь 30-це чистэ сонензэ топодить 90 иеть! Боецтнэнь пельде «сиянь» волонтертнэнень сюкпрянь валт евтась СВО-нь ветеранось Юрий Полобичев. Сон тешкстась, келя, минек аватнень ды сырькайтнень путовксост фронтонтень пек питней. «Z-сети Мордовия» куронь филиалтнэ важодить весе районтнэва, малав колмо тежат ломанть вейсэндявсть вейс.