Геройтнеде ледстнематне а стувтовить зярдояк
Геройтнеде ледстнематне а стувтовить зярдояк Кочкуровань райононь Семилеень средней школань 12 иесэ тонавтницясь Максим Чиндяскин саизе омбоце тарканть «Памяти героев верны» творческой роботань Весероссиянь пелькстамосонть, конань вана уш нилецеде ютавтызе «Защитники Отечества» Госфондось. Конкурсонть бажамокс ашти геройтнеде ды специальной военной операциянь тевтнеде ледстнематнень ванстомась. Тедеде пелькстамосонть ерокчист невтизь 7 иестэ саезь 91 иес Россиянь эрицятне. Важодевксэст ванкшновсть вейксэ номинациянь коряс: спецоперациянь тевтнеде ды военной династиятнеде эссеть ды евтнемат, авторонь стихть ды морот, фотографият ды артовкст, конатне алтавить СВО-нь геройтненень, истя жо «героентень сермат». 7-це классо тонавтницясь Максим Чиндяскин ерокчинзэ невтизе «эссе» номинациясонть. Наталья Позднякова тонавтыцянзо марто сынь невтизь важодевксэст, конась алтави Семилеень эрицянтень Владислав Лапшовнень. Фронтов церась туекшнесь седеензэ тердеманть коряс, парсте топавтсь воинэнь долгонзо. Владислав Лапшов маштовсь 2025 иень январьстэ СВО-нь таркатнесэ ды куломадо мейле казевсь Мужествань орденсэ. Эсензэ евтнемасонть Максим сермадсь: «Мон а содаса, мезде сон арсесь меельце минутатнестэ. Паряк, школадо, оятнеде, авадонзо… Ансяк содаса вейкенть: сонзэ теевксэзэ ды максозь эрямозо свалшкас сермадовить минек школань историянтень. Аволь почетонь лаз лангс сырнень буквасо, весень седейтнес (кить сонзэ содылизь) пшти сэредькссэ. Минь ней кастано неть ледстнематнень марто. Ды зярдо листяно покш эрямов, карматано кандомо эсенек эйсэ сонзэ образонть – сэтьме вайгель ды кеме кедь марто церанть, конась свалшкас кадовсь одокс, ансяк кенерсь улемс алкуксонь церакс». Жюрись путсь покш питне Мордовиясто тонавтницянть важодевксэнтень. Рузонь келень ды литературань тонавтыцясь Наталья Позднякова тешкстась: «Эзинек учнеяк, што туи мельс сермадовксонок. Минь эссенть сермадынек лиятнеде аявовиця велень церадонть, конась тусь СВОв ды кармась рузонь раськенть ванстыцякс». «Памяти героев верны» пелькстамонь изницятне казевить Московонь Изнямонь Музейсэ ноябрянь 8-це чистэ.