❗❗Зыянс понгсь студенткась
❗❗Зыянс понгсь студенткась Саранск ошка Россиянь УМВД-нь 3-це № ОПв пшкадсь 22 иесэ Ульяновской областень эрицясь, конась тонавтни Мордовиясо, ды пачтясь 2 млн 500 тежат целковоензэ манязь саламодо. Зыянс понгозесь евтнесь, важодемань коряс сон ульнесь Московонь областьсэ. Те шкастонть сонензэ гайневтсь а содавикс ломань, конась евтызе прянзо военкоматсо важодицякс, ды вешсь тейтеренть кедьстэ евтамс паспортонь данноензэ, сынь, келя, эрявить СВО-нь таркатнесэ маштовозь тетянзо ули-паронть примамга. Теде мейле кортамось сеске лоткавтозель. Шкань ютазь Госуслугань порталонь технической поддержкань «важодицянть» пельде тейтерентень сась пачтямо, конасонть сермадозель, буто персональной данноензэ тевс нолдызь мошенниктне. Тейтересь тандадсь ды сась мельс молемс МФЦв, ансяк те шкастонть тензэ таго гайневтсь а содавикс авась, конась теде икеле кортнесь мартонзо, ды пачтясь, келя, зыянс понгозенть пельде сон сермадсь яволявтома, мезенть кувалма студенткантень эряви сюлмавомс евтазь номерганть ФСБ-нь сотрудниктнень марто. Тейтересь гайневтсь, сонензэ мерсть, келя, мекс-бути сынь а кемить сонзэ тевтеемантень, секс эряви кемевтема, што тейтересь преступной тевс апак човоряво. Теде мейле кортамось тусь видеоконференциянь лувсо Россиянь Центробанконь «сотрудник» марто, конась евтынзе, кодат заявленият ды документт эрявить сермадомс ды пурнамс. Весе кадовикс шканть перть сонзэ эзизь кадокшно мошенниктне. Зярыя чинь ютазь ФСБ-нь «сотрудникесь» пачтясь тейтерентень, келя, банксо ванстовиця ярмаконзо бажить саламс манчицятне. Азарсь ломантнень тевест а лисемга эрявить саемс сынст банксто ды тешкстазь шкасто максомат курьернэнь. Студенткась топавтынзе весе кармавтоматнень, саинзе банксто 2 млн 400 тежат целковойтнень ды Подольскойсэ вокзалонть вакссо максынзе а содавикс авантень. Омбоце чистэ зыянс понгозенть марто сюлмавсь буто ФСБ-нь сотрудникесь ды пачтясь, келя, тейтеренть пельде мошенниктне бажить саемс кредит. Секс тевенть лоткавтомга эрявсь таго кучомс 100 тежат целковойть. Зярыя чинь ютазь студенткась велявтсь Саранскоев, ды уш тесэ чарькодсь, козонь понгсь. Нама, лезкс мельга пшкадсь полицияв. Мордовия Республикава МВД-сь кармавты ломантненень ваномс пштистэ, улемс валдо превсэ, штобу а понгомс зыянов тевень теицятнень кечказозост. Банконь, правоохранительной органтнэнь ды государственной структуратнень сотрудниктне зярдояк а вешить кучомс ярмакт, телефонс смс вельде кучозь кодт ды банконь картань даннойть.