❗❗Ярмактне тусть зыянонь теицятнень зепс❗❗

❗❗Ярмактне тусть зыянонь теицятнень зепс❗❗ «Чамзинский» Россиянь МВД-нь ММОв пшкадсь 19 иесэ те райононь эрицясь, конась пачтясь 3 миллионт 750 тежат целковоензэ манязь саламодо. Саранскоень вузонь студентканть валонзо коряс, мессенджерс тензэ сась школань прявтонть лемензэ пельде, косо сон теде икеле тонавтнесь, пачтямо. Мартонзо сюлмавицясь евтнесь, келя, икелень зярыя тонавтницятне салава микшнесть банконь картат, ды кой-кодат кевкстематнень толковамга тейтеренть марто сюлмави ФСБ-нь сотрудник. Кортнеманть пингстэ «ФСБ-сэ важодицясь» мерсь, келя, тейтересь беряньстэ маряви, секс кучсь тензэ ссылка, конантень ютамодо мейле кортамось поладозель видеоконференцсвязенть вельде. «Правоохранительной органтнэсэ важодицясь» тейтерентень невтизе уголовной тевень ушодовомадо уведомлениянть ды толковась, келя, эряви ванкшномс закононь коряс-аволь таштавсть сонзэ кедьсэ ванстовиця ярмактне. Тень туртов эрявсь ярмактнень кучомс евтазь реквизиттнэва. Аферистэнтень кемезь, тейтересь асодавикстнэнень кучинзе малав 700 тежат целковойтнень, конатне тензэ сатотсть маштовозь братонть кис. Зярыя чинь ютазь тейтеренть банконь счетс сась 3 миллионт 100 тежат целковоень покшолмасо эште вейке пандома, конатнеде истя жо пачтясь мошенникентень, конась мерсь, келя, сынсткак эрявить декларировамс, тень туртов максомат «правоохранительной органтнэсэ важодицянтень». Саранскойсэ улезь, тешкстазь шкантень тейтересь мольсь евтазь адресэнтень, косо буто ютавтовсть следственной тевтне, ды ярмактнень максынзе од церантень. Теде мейле аферисттнэ емасть. Зыянс понгозесь фатясь манямонтень ды пшкадсь лезкс мельга полицияв. Мордовия Республикава МВД-сь кармавты ломантненень ваномс пштистэ ды а максомс прянть манямс. Киненьгак илядо евтне куш косо ванстовиця ярмактонк. Банксо, правоохранительной органтнэсэ ды государственной структуратнесэ важодицятне зярдояк а кармавтыть ярмаконь кучомо, телефонга а вешить смс вельде сазь кодт ды банконь картань даннойть.