❗❗Эрямосто тусь Мордовия Республикань культурань заслуженной важодицясь, прозаикесь ды ...
❗❗Эрямосто тусь Мордовия Республикань культурань заслуженной важодицясь, прозаикесь ды журналистэсь, «Эрзянь правда» газетань икелень важодицясь Николай Яковлевич Тремасов. Н.Я. Тремасов чачсь 1948 иень ноябрянь 3-це чистэ Дубенка велесэ. Школанть прядомадо мейле ламо иень перть важодсь стройкасо: каменщикекс, монтажникекс. 1985 иестэ заочна прядызе М.Е. Евсевьев лемсэ МГПИ-нь химиянь-биологиянь факультетэнть. Эсь творческой кинзэ ушодызе 70-це иетнестэ. Васенце зарисовканзо, корреспонденциянзо лиснесть «Саранскжилстрой» трестэнь «Строитель» газетасо, конань ульнесь покш тиражозо. Секе шкастонть сермалесь республикань лия газетатнескак, варчнесь виензэ Мордовиянь ГТРК-со. 1981 иестэ Николай Яковлевич ютась важодеме «Мордовпромстрой» трестэнь «Трибуна строителя» газетав. Кавто иень ютазь кармась сонзэ редакторокс. 1994 иестэ саезь зярыя иеть важодсь «Эрзянь правда» газетасо, васня корреспондентэкс, мейле – прявт редакторонь полавтыцякс. 1983 иестэ Николай Тремасов совавтозь СССР-нь Журналистэнь союзонь вейсэндявксонтень. Журналистэнь тевенть топавтома шкасто ушодсь важодеме художественной произведениятнень лангсо. «Касарка» васенце евтнемазо лиссь 1983 иестэ «Звенья» вейсэнь пусмосонть. Мейле нолдазель «Ржавый топор» (1989 ие) эйкакштнень туртов васенце книгазо. Ловныцятне вастызь сонзэ пек лембестэ. 1991 иестэ лиссь «Нежность волчицы» омбоце книгазо. Теде мейле, 1995 иестэ, нолдазель «Отказ от земного» повестень пусмозо. 1997 иестэ – «Какая бабочка красивее», 2001 иестэ – «Чудо-веретено». 1999 иестэ саезь Мордовиянь сермадыцянь XIV-це съездсэнть Н.Я. Тремасов совавтовсь РФ-нь Писателень вейсэндявксонтень. Сон эрьва иестэ сакшнось Мордовиянь од сермадыцянь семинартнэс. Тонавтсь од ломантнень, кунсолось сынст мелест. 2006 иестэ Николай Яковлевичнень максозь «Мордовия Республикань культурань заслуженной важодиця» лемесь. Н.Я. Тремасов сови неень шкань сермадыцятнень юткс. Сонзэ творчествазо тонавтневи школатнесэ ды тонавтомань лия заведениятнесэ. Весе произведениянзо ловновить шождасто, сюжеттнэ саезь эрямосто ды ванновить сеть мелявкстнэ, конат талновтыть течи. «Эрзянь правда» газетань коллективесь евты седеймарямо Николай Яковлевичень малавиксэнзэ туртов. ‼Меельце килангов ильтямось карми ноябрянь 3-це чистэ Саранскоень Иоанно-Богословской кафедральной соборсо (Демократической куронь 28-це кудось) 10:30 чассто.