СВО-нь ветерантнэ тонавтнить «Фермерэнь школасо»

СВО-нь ветерантнэ тонавтнить «Фермерэнь школасо» Неть читнестэ Московсо ютавтозель вастовома спецоперациянь участниктнень марто, конатне тонавтнесть «Школа фермера» образовательной проектэнть лувсо, сонзэ тевс совавтыть «Защитники Отечества» Госфондонть лезксэнзэ пингстэ РФ-нь Минсельхозось ды «Россельхозбанкось». Мероприятиясонть ульнесть статс-секретаресь – РФ-нь оборонань министрань полавтыцясь, «Защитники Отечества» фондонь председателесь Анна Цивилева ды «Россельхозбанк» АО-нь Правлениянь Председателесь Борис Листов. Те теварсевксэсь лезды СВО-нь ветерантнэнень ды сынст малавикстнэнень тонавтнемс од профессиятнес ды ушодомс эсь тев велень хозяйствасо. Проектэнь сексень пельксэсь неень шкасто топавтови масторонь 69 регионтнэсэ, ютксост Мордовияськак. Те тевсэнть максовить содамочить садонь, ягодань, модамарень, эмежень кастомань, ракшань трямонь, мекшень кирдемань коряс, истя жо агротуризманть ды велень хозяйствасо цифровой технологиятнень коряс. Саезь содамочитне «Фермерэнь школанть» прядыцятненень лездыть ветямс кочказь важодеманть. СВО-нь ветерантнэнь туртов улить лезксэнь башка лувт, ютксост «Агромотиватор» грантось. «Защитники Отечества» ды «Россельхозбанконть» ютксо вейсэнь важодеманть смустезэ сеньсэ – лездамс геройтненень ды сынст малавикстнэнень профессиональной кинть кочкамосо. Кизэнть прядовомсто Россиянь 64 регионтнэсэ ютавтозельть «Начни свое дело в АПК» лементь ало эксперттнэнь марто вастовомат, конатнень лувсо ветерантнэнень евтнезельть аграрной енкссонть важодемань китнеде-янтнэде. Истя жо мольсть тонавтомат финансонь тевтненень. 2026 иестэ ветерантнэнень ды сынст малавикстнэнень лездамга арсеви ютавтомс 200 мероприятият. Мордовиясо кавто иень перть «Фермерэнь школань» программанть коряс тонавтнесть СВО-нь 18 ветерант ды сынст малавиксэст. Программанть прядыцятнестэ вейкесь – Орданьбуень районсто фронтовикесь Иван Коробков. Сонензэ максозель 4,5 миллионт целковоень покшолмасо грант, ярмактнень лангс рамась комбайна, конасонть важодсь сексень перть. Мелень иень цетамотнень коряс, Коробков ветеранось кармась республикань ушодыця фермертнэстэ сехте вадрякс. «Школа фермера» проектэнь неень сменасонть, конась карми молеме декабрянть прядовомс, тонавтнить республикань эште 16 геройть ды сынст малавиксэст.