❗❗Мордовиясо манчицятнень пельде ёмавксось кармась 300 миллиондо ламо целковойть

❗❗Мордовиясо манчицятнень пельде ёмавксось кармась 300 миллиондо ламо целковойть Иенть ушодовомсто республикасонть панжозь 1500 ламо уголовной тевть манчемань тевтнень коряс. Истят даннойть ёвтазельть Мордовиянь Пресс-центрасо пресс-конференциясо, кона алтазель эрицятнень манчемань профилактикантень. Кортамосонть ульнесть прявт ведомстватнень представительтне: МР-ва МВД-нь УООП-нь отделэнь прявтонь полавтыцясь Александр Рубцов, МР-ва «Защитники Отечества» фондонь филиалонь социальной координаторось Светлана Кочеткова ды РФ-НЬ ЦБ-нь Вятской ГУ-нь Рм-ва национальной банконь отделениянь безопасностень отделэнь прявтось Александр Петров. Александр Рубцовонь валонзо коряс, манчемань сехте сеедьстэ вастневиця схематне сюлмавозь «зыянтомо ловомадо» легенданть, Госуслугань важодицятнень пельде аволь алкуксонь тандавтнематнень ды аволь алкуксонь пшкадематнень марто. Манчицятне гайневтить эрицятненень — истя жо WhatsApp, Viber ды Telegram вельде ды вешить ютавтомс ярмактнень «зыянтомо счётс» эли аравтомс «зыянтомочинь программа», кона тевсэ максы тенст васоло ки телефононтень. Истя жо зыяновт гайневтематне сеть ломантнень пельде, кить невтить пряст «прокуророкс» ды «ФСБ-нь сотрудникекс»: сынь пачтить малавиксэст марто зыянтнэде (ДТП-ть, уголовной ответственность) ды вешить куроксто ютавтомат. Редявикс тевтнень ютксо-80 иесэ пенсионерканть историязо, конась макссь манчицятненень 80 миллионт целковойть, кемсь, сонзэ цёразо понгсь зыянс. Эште вейке талновтыця пельксэсь-республикань 53 иесэ эрицянтень курьерэнтень (дропперэнтень) 11 миллионт целковойтнень максомась: сонензэ алтасть «ванномс» маштовозь цёранзо кисэ пандоматнень. Ней курьерэсь кундазь, кавонест тевтне аштить ванномань таркасо. Правань ванстыцятне ды Россиянь Банкось ледстнить зыянтомочинь шожда правилатнень: «Зыянтомо счётонть» ледстямсто сеске лоткавтынк кортамонть; илядо ёвтне киненьгак СМС-стэ кодтнэнь ды илядо гайневте номертнэва акемевикс пачтямотнестэ; малавикстнэде куш кодамо талновтыця кулянть одс ваннынк, мартост видьстэ сюлмавозь. 2026-це иестэ саезь банктне кармить ливтеме лангс 12 ёнксонь коряс акемевикс ютавтоматнень ды лоткавтомо истят операциятнень. Теде башка, манчемадо мереви куроксто яволявтомс банконь мобильной приложениянть вельде — офисэв апак совсе. Рискень таркасо СВО-нь участниктнень семиятне. Манчицятне каявить сынст лангс пандоматнесэ, казнетнесэ ды ёжомарямонь ёжосо налксезь. «Защитники Отечества» фондось мери видьстэ пшкадемс социальной координатортнэнень ды ванномс пачтязь кулянть «ВКонтакте» ды «Одноклассники» орфицальной группасонть, косо Отечествань Ванстыцянь Фондось свалшкань лувсо путы кулят манчемань, кардамонь ды профилактикань од видтнэде. Ольга Аверьянова