Ҡәҙерле өлкән быуын кешеләре, хөрмәтле яҡташтар!
Ҡәҙерле өлкән быуын кешеләре, хөрмәтле яҡташтар! Тиҙҙән, 1 октябрҙә, беҙ Халыҡ-ара ололар көнөн билдәләйбеҙ. Был – һеҙҙең алда баш эйеп, аҡылығыҙ, сабырлығығыҙ һәм беҙгә биргән изгелектәрегеҙ өсөн сикһеҙ рәхмәтебеҙҙе белдереү өсөн тағы бер матур мөмкинлек. Һеҙ – беҙҙең таянысыбыҙ, тормош юлыбыҙҙағы яҡты маяҡ. Йәш быуын һеҙҙең кәңәштәрегеҙгә мохтаж, һеҙҙең тәжрибәгеҙ – беҙҙең өсөн оло хазина. Районыбыҙҙа был байрамға әҙерлек ҡыҙыу бара. 1 октябрҙә ауылдарыбыҙҙа, ойошмаларҙа байрам осрашыуҙары, сәй табындары һәм концерттар ойошторола. Беҙ бер генә кешенең дә иғтибарҙан ситтә ҡалмауын теләйбеҙ. Әгәр ҙә ниндәйҙер сәбәп менән саҡырыу алмаһағыҙ йәки ҡайҙа барырға белмәһәгеҙ, борсолмағыҙ. Ауыл хакимиәтенә йәки элек эшләгән ойошмағыҙға мөрәжәғәт итегеҙ – һеҙҙе унда һәр ваҡыт ихлас ҡаршы аласаҡтар. Ә 2 октябрҙә Асҡарҙа район мәҙәниәт йортонда ҙур тантаналы сара үтәсәк. Һеҙҙе унда ла түҙемһеҙлек менән көтөп ҡалабыҙ! Был байрам – элекке дуҫтар, хеҙмәттәштәр менән осрашып, күңел йылыһын бүлешеү өсөн бик шәп сәбәп. Һеҙҙең менән осрашыуҙар – беҙҙең өсөн ҙур бәхет. Һау-сәләмәт булығыҙ, йорттарығыҙҙан шатлыҡ өҙөлмәһен!