Октябрьский ҡалаһында Ғата Сөләймәнов исемендәге XXV Республика ҡурай байрамы үтте.
Октябрьский ҡалаһында Ғата Сөләймәнов исемендәге XXV Республика ҡурай байрамы үтте. Унда Башҡортостандың һәм Силәбе өлкәһенең 30 ҡала-райондарынан 400-гә яҡын башҡарыусы ҡатнаша. Башҡортостанда иғлан ителгән Ҙур һәм татыу ғаилә йылында ойоштороу комитеты яңы «Ғаилә ансамблдәре» номинацияһын индергән. Унда 6 ғаилә коллективы үҙ көсөн һынай. Тәүге көндә башҡарыусылар һәм ансамблдәр араһында асыҡ тыңлауҙар, ижади лаборатория, ҡурайсылар аллеяһында ағас ултыртыу, экскурсиялар, шулай уҡ Башҡортостан Республикаһы ҡурайсылар союзы ултырышы ойошторола. Иң йәше Сибай ҡалаһынан 7 йәшлек Эмир Савинкин булһа, иң өлкәне - Бөрйәндән 65 йәшлек Ринат Абдуллин. Гран-приға Стәрлетамаҡ ҡалаһынан Динар Абдуллин лайыҡ булды. Ансамблдәр араһында 16 йәшкә тиклемгеләр араһында конкурстың I дәрәжә лауреаттары - Дәүләкәндән Р.Х.Тимеров етәкселегендәге өлгөлө ҡурайсылар ансамбле; Рәми Ғарипов исемендәге 1-се республика башҡорт интернат- гимназияһының В.Р.Баймырҙин етәкселегендәге Әҙеһәм Исҡужин исемендәге өлгөлө ҡурайсылар ансамбле. 16 йәштән өлкәндәр араһында - Белорет ҡалаһының " Иҙел башы", Бөрйән районының "Мәсемташ" халыҡ ансамблдәре еңеүсе. 12 йәшкә тиклемге солистар араһында Өфөнән Әмир Кәримов һәм Октябрьский ҡалаһынан Михаил Бронников иң-иңе булып танылды. 12-16 йәшлектәр араһында Баҡалынан Азамат Ханнанов I урын яуланы. 16 йәштән өлкәнерәктәр араһында Өфөнән Илгиз Нәҙерғолов, Баймаҡ районынан Хәбир Аралбаев, Әлшәй районынан Нияз Ғиззәтуллин еңеү яуланы. Ғаилә ансамблдәре араһында Баҡалы районынан Ханнановтар ғаиләһе - I урында.