Хьамсара мехкахой! — 23 февраля 2026 г. в 12:57:53.768
Хьамсара мехкахой! 1944-ча шера вай мехкахдахар дерригача къаманна хинна йоккха чов я. Саькура бетта 23-ча дийнахьа нохчий къаманца цхьана, цхьаккха бехк боацаш, дахача моттигера низагӏа дохадаь; гаьнарча, хийрача Казахстане, Юкъерча Азе ӏодахьийтад вай. Дукха шераш дӏаихадале а, из чов ерзанза латт къаман вахаре. Лакха денал, яхь гойташ лаьттар цу хана вай дай. Боккхийчар къахьийгар къаман хӏама лораде гӏерташ; цу ӏазапа, боха ца бохаш, духьаллатташ. Даьхенна гаьна боллашехь, шоай культура, мотт, ӏадаташ, беркате оамалаш лораеш, уж хӏамаш хийра ца доалийташ, цхьа дезал санна вӏаший оагӏув хьаллоацаш, лаьттар нах. Къаьстта доккха баркал оал вай цу бирсача шерашка вай даьшта гӏо деш, царца къахетаме хиннача къамашта. Хӏара дика гӏулакх дегашка, замашца дахаргда массахана! Къам мехкахдаккхар Даьхен лорабой дийнахьа хилар, бакъда гӏалгӏай къаман Даьхенцара безам, лерхӏам эшабе аьттув баланзар цар. Вай къаман нах массахана майралца, деналца, Даьхен гӏулакха кийча хиларца белгалбоалаш хиннаб. Тахан а из декхар дӏахохьош ба вай мехкахой. Россе къамашца машарца, бартаца дахаш; республикан, къаман хӏама лораде дезаш да вай тахан. Вайх хӏаранена хьалхашкара лоархӏаме декхар да из! Дӏадахар, хиннар дагадоагӏаш, къахьегаш, дешаш; къаман кхоане сийрда хилийтара тӏехьалаттарех да вай. Гаьнарча, хийрача мехка; цу бирсача шерашка вахар хаьдарий дезалий оагIув хьаллоацаш, царца хало екъаш ва со тахан. Байнарех Дала гешт долда, Дала къахетам болба! Дала воча, харцача хӏамах лорадолда вай къам! Барт, ираз, беркат, къахетам хилба хӏара цӏагӏа!