Хорсуннар ааттара умнуллубат.
Хорсуннар ааттара умнуллубат. Бүтүн Дойду үрдүнэн анал байыаннай дьайыыга сырдык тыыннарын толук уурбут, бойобуой дьайыы бэтэрээннэрин ааттарын үйэтитэр «Дьоруой паартата» диэн үтүө үгэс олоххо киирбитэ. Бу бырайыак «Биир ньыгыл Арассыыйа» баартыйа көҕүлээһининэн киэҥ далааһыннаахтык үлэлиир. Бүгүн биһиги үөрэхпит кыһатыгар — Ньурба техникумугар — бэлиэ күн. Арассыыйатааҕы «Герой паартата» бырайыак чэрчитинэн, биһиги биир дойдулаахтарбыт, техникуммутугар идэ ылбыт Ушканов Семен Владимирович, Никифоров Павел Афанасьевич, Захаров Василий Егорович ааттарын үйэтитэр сыаллаах «Герой паартатын» арыйдыбыт. Бу долгутуулаах күҥҥэ Арассыыйа дьоруойа Андрей Николаевич Григорьев-Тута, Семен Владимирович күн күбэй ийэтэ Розалия Семеновна, бииргэ төрөөбүт быраата Виктор Владимирович, Павел Афанасьевич эдьиийэ Надежда Геннадьевна, Захаров Василий эдьиийдэрэ Прасковья Михайловна, Сардана Владимировна, Антонина Семеновна ыҥырыылаах ыалдьыт буоллулар. Бу күн биһиги биир дойдулаахпыт Маар бастыҥ эдэр ыччата, сэрии хонуутугар сырдык тыынын толук уурбут Валентин Валентинович Иванов аҕата Валентин Павлович суруйбут Николай Антонов дьүрүлүгэр «Туох иһин» ырыата сүрэҕи долгутта. Ньурбатааҕы техникум дириэктэрин солбуйааччы Егор Христофорович Афанасьев кэлбит ыалдьыттарга махтанан, техникум аатыттан сэмэй бэлэхтэри туттартаата. СӨ үөрэҕириитин туйгуна, профессиональнай үөрэхтээһин бэтэрээнэ Розалия Владимировна Бурнашова бу суолталаах тэрээһиҥҥэ кэлбит ыалдьыттарга махталын биллэрдэ. Арассыыйа үөрэхтээһинин бочуоттаах үлэһитэ, Саха Өрөспүүбүлүкэтин үөрэҕириитин туйгуна Александра Гаврильевна Александрова Дьоруой уолаттарбыт тустарынан ахтыы оҥорон кэпсээтэ. «Көмүскэл» сыах салайааччыта Галина Дмитриевна, волонтер Мотрена Прокопьевна бэйэлэрин үлэлэрин, баҕа өттүнэн күүс-көмө оҥоһулла турарын сырдаттылар. Герой диэн кимий? Кини — уустук кэмҥэ дойдуга, норуокка муҥура суох бэриниилээҕин, хорсун санаатын, сырдык олоҕун толук ууран туран, Ийэ дойдутун көмүскээбит киһи. Кини аата хаһан да умнуллубат.