ГБУ РС(Я) «Управление ветеринарии с ветеринарно испытательной лабораторией Сунтарского улуса (района)»
Новости · 1 мая 2026 г.
Айар-тутар дьиэ кэргэн. — 1 мая 2026 г. в 23:55:11.592
Айар-тутар дьиэ кэргэн. Муус устар 15 күнүгэр Сунтаар улууһун Кэмпэндээйи нэһилиэгиттэн талба талааннаах, айар дьоҕурдаах Эдуард уонна Лира Герасимовтар дьиэ кэргэттэрэ айан-тутан, чочуйан оҥорбут оҥоһуктарын быыстапката С.А.Зверев-Кыыл Уола аатынан түмэлгэ үөрүүлээх быһыыга майгыга аһылынна. Герасимовтар дьиэ кэргэттэрин аймахтара-доҕотторо, бииргэ үөрэммиттэрэ, кэллиэгэлэрэ уонна ыҥырыылаах ыалдьыттар быыстапкаҕа кэлэн сэрггэ, кэрэхсээн, дуоһуйан бардылар. Ыал иһирэх ийэтэ кэлбит ыалдьыттары алгыстаах алаадьыннан, уохтаах кымыһынан күндүлээтэ. Ньургун Герасимов ылбаҕай ырыатынан кулгааҕы сымнатта. Ыал аҕа баһылыга быыстапкаҕа кэлбит дьоҥҥо махтанан туран оҥоһуктарын быыстапкатын көрөргө ыҥырда. Эдуард Кэмпэндээйи бэтэринээрнэй пуунун сэбидиссэйинэн 2018 сылтан үлэлиир, эдэр ийэ Лира оскуолаҕа эбии үөрэхтээһин учууталынан үлэлиир. Бары өттүнэн талааннаах ыалга айар тутар үлэлэригэр өссө үрдүктэн үрдүк чыпчааллары ситиһэллэригэр баҕарабыт.