Чурапчы улууһун баһылыга Степан Саргыдаев планеркатыгар ааспыт нэдиэлэ устатыгар ыытылл... — 15 июня 2026 г. в 13:23:46.480
Чурапчы улууһун баһылыга Степан Саргыдаев планеркатыгар ааспыт нэдиэлэ устатыгар ыытыллыбыт үлэлэр түмүктэрин иһитиннэрдэ, үүммүт нэдиэлэ үлэлэрин хайысхатынан саҥа соруктары туруорда. Ол курдук, Чурапчы гимназиятын үөрэнээччитэ Ньургуйаана Егорова литература предметигэр экзамеҥҥа 100 баалы ылбытынан уонна бу предмеккэ республика үрдүнэн соҕотох уһулуччу көрдөрүүнү ситиспитинэн Ньургуйаанаҕа, кини учууталыгар Александра Апрельевнаҕа, төрөппүттэригэр, гимназия коллективыгар баһылык планерка кэмигэр өссө төгүл эҕэрдэтин эттэ. Маны сэргэ Чурапчы гимназиятыттан Старостина Сардаана, Сивцева Айсана Куо историяны 87 баалга туттарбыттар. Одьулуун оскуолатын выпускницата Ефимова Айта историяны 94 баалга суруйан, уопсай үөрэх хаачыстыбатыгар республикаҕа үчүгэй көрдөрүүнү ситиспиттэрэ бэлиэтэннэ. Быйылгыттан улуус өттүттэн ЕГЭ-ни 80-тан тахса баалга суруйбут оҕолорго кытта өйөбүл көрүллэрин туһунан быһаарыы ылыллыбытын баһылык иһитиннэрдэ. Чурапчы улууһун Мугудай нэһилиэгиттэн төрүттээх биллэр олоҥхоһут, норуот ырыаһыта, остуоруйаһыт, уран тарбахтаах туосчут Пелагея Михайловна Терютина-Ырыа Ымыычаан үрдүк аатыгар ыытыллыбыт улуустааҕы Олоҥхо ыһыаҕа көхтөөхтүк, үрдүк тэрээһиннээхтик ааспыт. Ыһыах биир уратытынан тыа хаһаайыстыбатын улууһа буоларбытынан Вячеслав Барашков бырайыагын өйөөн, сахалыы хотуур конкурсугар Хоптоҕоттон эдэр уус кылаан кыайыылаах аатын ылла. Эбии үөрэхтээһин үлэһиттэрин иккис республикатааҕы форумугар 10 улуустан 300-тэн тахса кыттааччы, ону таһынан үөрэх миниистирэ Ньургууна Соколова кэлэн, эбии үөрэхтээһин эйгэтигэр көдьүүстээх тэрээһиҥҥэ кыттыбыттар. Миниистир “Кыталык”, “Ымыы” уһуйааннарга, “Кустук” оҕо сынньанар лааҕырыгар сылдьан көрөн-истэн, министиэристибэ өттүттэн өйөбүл көрүллүөҕүн туһунан эппит. Улуус баһылыга сайыҥҥы оҕо лааҕырын материальнай-техническэй баазатын бөҕөргөтүү хайысхатыгар федеральнай программаларга кыттарга быйыл барытын бэлэмнээн, эһиил хайаан да кыттар сыалы-соругу улуус үөрэххэ управлениетыгар туһаайан эттэ. Россия күнүгэр оҕолор аан бастаан пааспардарын туттулар. Сомоҕолоһуу үөрүүтүгэр элбэх киһи сүүрүүгэ кытынна. Дьокуускайга буолуохтаах «Дьулуур” адаптивнай спорт республикатааҕы спартакиадатыгар кыттааччылары атаарыы сиэрэ-туома буолла. Маны сэргэ планеркаҕа Туймаада ыһыаҕар итиэннэ улуус ыһыаҕар кыттарга бэлэмнэниилэр бары көрүҥэринэн күүскэ бара тураллара бэлиэтэннэ. Полиция отделын сводкатынан 37 сайабылыанньа киирэн үлэ барарын, ГАИ хайысхатынан 312 түгэн регистрацияламмытыттан 66-гар протокол толоруллан үлэ барарын туһунан иһитиннэрдилэр. Ол курдук арыгы иһэн баран уруулга олоруу, суол быраабылатын кэһэн сорох массыына штрафстоянкаҕа туруоруллубута, Мугудайга икки киһи массыынаҕа эчэйии ылан балыыһаҕа киирбиттэрэ бэлиэтэннэ. Суолга сэрэхтээх буолууну хонтуруолга тутууну өссө күүһүрдэр сорук планеркаҕа туруорулунна. Планеркаҕа улуус ыһыаҕын иннинэ тэрилтэлэр кэлэктииптэрэ субуотунньукка, ыһыах тэрээһинигэр, репетицияларга, лотореяны тарҕатыыга кыттыыларын, ыһыах программатын, тэрээһинин туһунан улуус баһылыгын солбуйааччы Мария Кронникова иһитиннэрдэ. Маны таһынан «Якутские Экосети” компания бөҕү икки массыынанан таһар боппуруоһа быһаарыллан эрэрин, окко киириэх иннинэ Аллараа Бэстээхтэн Чурапчы улууһугар тиксибит техниканы аҕалыы күүтүллэрин, ардах кэмигэр сөпкө түһэн, улууска от үүнүүтэ үчүгэй буолуоҕар эрэл баарын туһунан кэпсэтиилэр бардылар.