ГОСПАБЛИК МБОУ "Чурапчинская гимназия им. С. К. Макарова"
Образование · 27 февраля 2026 г.
🏃Бүгүн, олунньу 27 күнүгэр, Н.Д.Кривошапкин-Субуруускай аатынан Болтоҥо орто оскуолата... — 27 февраля 2026 г. в 18:46:00.014
🏃Бүгүн, олунньу 27 күнүгэр, Н.Д.Кривошапкин-Субуруускай аатынан Болтоҥо орто оскуолата биллэр судаарыстыбаннай диэйэтэл, гражданскай сэрии кыттыыылааҕа, кыһыл хамандыыр Н.Д. Кривошапкин-Субуруускай төрөөбүтэ 130 сылын көрсө улуустааҕы “Уот боотур” диэн 5-6 кылаас уолаттарыгар күрэхтэһии тэрийэн ыытта. Күрэхтэһии сүрүн сыалынан Уот Субуруускай аатын үйэтитии, кини олорбут, үлэлээбит, тэрийбит тосхоллорунан сиэттэрэн, уол оҕо этин-сиинин эрчийии, тобуллаҕас толкуйун, өркөн өйүн сайыннарыы, киһилии киһи буолан тахсарыгар олук уурар кыаҕын арыйыы буолар. Барыта 5 хамаанда 9 түһүмэҕинэн илин-кэлин түһүстэ. С.Д.Флегонтов аатынан Хадаар орто оскуолата строевой хаамыыга кимҥэ да иннин биэрбэтэ, бары биир тэҥ юноармейскай формалара, берцылара уолаттар тэҥҥэ хамсаныыларын ордук күүһүрдэр, киэргэтэр. В.С.Соловьев-Болот Боотур аатынан Хатылы орто оскуолатын “Хотой” бөлөҕө оҕунан ытыыга 1 очкону ылан, бу түһүмэххэ бастаата. Атын хамаандалар бары биир тэҥ 0 бааллаах хааллылар. Инники өттүгэр оҕунан ытыыга бары дьарыктаныахтарын наадата билиннэ. С.А.Новгородов аатынан Чурапчы орто оскуолатын уолаттара ойбонтон уулааһыҥҥа, хары баттаһыыга уонна ыстаҥаҕа бастакы миэстэни ыллылар. Хаһаайыннар, Н.Д.Кривошапкин-Субуруускай аатынан Болтоҥо орто оскуолата, кириэс тэбиигэ уонна хомуурга инники күөҥҥэ таҕыстылар. Биһиги оҕолорбут, С.К.Макаров аатынан Чурапчы гимназиятын “Өркөн” бөлөҕө, гуманитарнай биридимиэттэр холбоспут олимпиада-өй күрэҕэр уонна хабылыкка бастаан, үөрүүбүт муҥура суох буолла. 5 кылаас үөрэнээччитэ Деллохов Арылхан хабылыкка, чахчы да, маастар кылаас көрдөрдө диэн, дьүүллүүр сүбэ үрдүк сыананы биэрдэ. Манна даҕатан эттэххэ, Арылхан, хамандыыр буолан, эппиэтинэһи бэйэтигэр ылан, хамаанданы бэркэ билиһиннэрдэ, строевой хаамыыны чуолкайдык салайда. Ох саанан ыппыт Дьулурхан Игнатьевпыт, төһө да таппатар, бэрт сатабыллаахтык туттар-хаптар, кыл мүччү сыыһа ытыталаата, дьарыктаннахха, төһө баҕарар киирсиэн сөптөөҕүн көрдөрдө. Ойбонтон уулааһыҥҥа Дамир Данилов бочуоттаах 2 миэстэ буолла. “Хомуур” диэн бэрт сэргэх оонньууга ыһыллыбыт кубигы төһө түргэнник хомуйаллара сыаналанар. Бу оонньуу уһуйаантан оскуолаҕа кэлбитин бэлиэтиир тоҕоостоох. Оҕоттон түргэн-тарҕан хамсаныыны, сымса буолууну эрэйэр оонньууга биһиги Беляев Эрсаммыт уонна кириэс тэбиигэ Неустроев Тимурбут 4 миэстэ буолан, хамаандаларыгар суолталаах баал аҕаллылар. Хары баттаһыыга Барашков Батаспыт, бөҕө-таҕа буоларын өссө туоһулаан, 2 бириистээх миэстэ буолары ситистэ. Түмүккэ хамаанданан уһуну ыстаныыга бочуоттаах 2 миэстэ буоллубут. Онон 9 түһүмэх түмүгүнэн 24 баалы ылан, биһиги “Өркөн” хамаандабыт “Уот боотур” диэн Муҥутуур кыайыылаах үрдүк аатын ыллыбыт. Уол оҕо өй-санаа, күүс-уох, эт-сиин өттүнэн дэгиттэр сайдарыгар туһуламмыт “Уот боотур” диэн өбүгэ оонньуутун күрэхтэһиитин тэрийбит Н.Д.Кривошапкин-Субуруускай аатынан Болтоҥо орто оскуолатын кэлэктиибигэр (дир. В.Р.Скрябин) махтанабыт. Инникитин бу оонньуу өссө сайдан, хас сыл аайы ыытыллар, элбэх уолу түмэр түһүлгэ буоллун! Барыыбытыгар-кэлиибитигэр көмөлөспүт Болтоҥо орто оскуолатын дириэктэрэ В.Р.Скрябиҥҥа, төрөппүппүт Н.П.Беляеваҕа, гимназиябыт дириэктэрэ Ю.М.Слепцовка махтанабыт. Салайааччы Ф.Н.Болдовская, С.К.Макаров аатынан Чурапчы гимназиятын учуутала.