ГОСПАБЛИК МБОУ "Чурапчинская гимназия им. С. К. Макарова"
Образование · 13 февраля 2026 г.
🌿🌿🌿Бүгүн өрөспүүбүлүкэ үрдүнэн төрөөбүт тыл уонна сурук-бичик күнүн бэлиэтиибит. Бу ... — 13 февраля 2026 г. в 16:40:45.758
🌿🌿🌿Бүгүн өрөспүүбүлүкэ үрдүнэн төрөөбүт тыл уонна сурук-бичик күнүн бэлиэтиибит. Бу күн 1892 сыллаахха Болтоҥо нэһилиэгин Чуораайытта алааһыгар бастакы сахалыы суругу-бичиги айбыт саха лингибиис учуонайа Семен Андреевич Новгородов күн сирин көрбүт күнэ. Саха Сирин бастакы Президена М.Е. Николаев 1996 сыл олунньу 9 күнүнээҕи 1294 №-дээх «Төрөөбүт тыл уонна сурук-бичик күнүн биллэрии туһунан» Ыйааҕыгар олоҕуран, С.А. Новгородов төрөөбүт күнэ — олунньу 13 күнэ — Төрөөбүт тыл уонна сурук-бичик күнүнэн биллэриллибитэ. Бүгүҥҥү суолталаах күҥҥэ анаан биһиги гимназиябытыгар араас үчүгэй тэрээһиннэр буоллулар. Гимназиябыт эбэлэрэ сарсыардаттан оҕолору, учууталлары минньигэс алаадьынан күндүлээтилэр. Онтон иккис этээскэ ийэлэр сахалыы оонньуулары оонньоттулар. Оҕолор эрэ буолбакка, учууталлар эмиэ сэргээн оонньоотулар. Ону таһынан, учууталларбыт сахалыы тыыннаах уруоктары ыыттылар. Холобур, биһиги кылааспытыгар нуучча тылын учуутала Марина Николаевна Керемясова олус интэриэһинэй нуучча тылын уруогун ыытта. Биир дойдулаахпыт Р.И. Корякина-Хотууна «Куобах» диэн остуоруйатын тылбаастаан холонон көрдүбүт. Тылбаастыыр олус уустук эбит. Саха тылын үчүгэйдик билэр буоллахха, табыллан тылбаастыыгын. Күммүт үөрүүлээх линиэйкэнэн түмүктэннэ. Онно 5 кылаас үөрэнээччилэрэ «Мөҥүрүүр Бөҕө» олоҥхону толордулар. Кырачаан гимназистарбыт оруолларын олус итэҕэтиилээхтик тиэртилэр. Онус кылаас уолаттара хоһоонунан дьүһүйүүнү аахтылар. Дьон болҕомтотун тартылар. Сахабыт тылын кэрэтин бука барыбытыгар өйдөттүлэр. Ураты түгэннэри бэлэхтээбиттэригэр төрөппүттэрбитигэр, учууталларбытыгар истиҥ махтал! Өссө төгүл төрөөбүт тыл уонна сурук-бичик күнүнэн эҕэрдэ! Сахабыт тылын харыстыаҕыҥ, таптыаҕыҥ! 📝Катя Монастырева, VIII «б» кылаас, «Тумус кыһа» медиа киин