🌞Олох-дьаһах
🌞Олох-дьаһах Нэһилиэккэ бу күн (фактическай көрдөрүүнэн) 360 киһи олохсуйан олорор. Сэрии сылын оҕото- 9. Бу күннэргэ бөһүөлэккэ араас таһымнаах үлэ ыытыллар. Социальнай суолталаах тэрилтэлэр эбийиэктэригэр өрөмүөн үлэлэрэ ыытыллан кэлэр кыстыкка, саҥа үөрэх дьылыгар бэлэмнэнэллэр. Кыһыҥҥы суол туруор диэри чох, уматык саппааһа баар. Бу күннэргэ олохтоох нэһилиэнньэ көҕүлээһинин өйүүр бырагыраама иитинэн Ыһыах ыһыллар былаһаакката саҥардыллар. Хамсааһын барарыгар уопсайа 2 975 000 солк. туһаныллыбыт. Ол курдук бырайыак олоххо киирэригэр нэһилиэнньэ 75 000 көмөлөспүт, олохтоох бүд дьүөттэн 400 000 тыырыллыбыт, бырагырааманан 2 500 000 көрүллүбүт. Маны сэргэ олохтоох дьаһалта дьаһалынан уулуссаларга, бөртөлүөт түһэр былаһааккатыгар тупсарыы үлэтэ ыытыллыбыт. Сиэн Күөл нэһилиэгиттэн төрүттээх анал байыаннай дьайыыга 14 байыас кытта сылдьар. Кинилэр дьиэ кэргэттэригэр араас кэмнээх өйөбүл, көмө оҥоһуллар. 🔥Ойуур баһаара Быйыл Ойуһардаах территориятыгар улахан ойуур баһаара туран, тулалыыр эйгэ сирин-уотун эмсэҕэлээн, нэһилиэнньэҕэ да бэрт уустук кэмнэри үөскэтэ сырытта. Уот бөһүөлэктэн 35 килэмиэтир тэйиэс сиргэ турбут. Баһаарга нэһилиэктэн уопсайа 37 киһи, араас тиэхиньикэ үлэлээбит. Уоту утары үлэлиир, айылҕаны харыстыыр хамаандалар, нэһилиэнньэ күүһүнэн ойуур баһаара атырдьах ыйын 16 күнүгэр тохтотуллубута. Ыксаллаах быһыы-майгы кэмигэр нэһилиэнньэ, үлэ тэрилтэлэрин күүстэринэн, үтүө хамсааһын чэрчитинэн, ас-таҥас, эмп-томп быыстала суох хааччылла турбут. 👩🏻⚕️Саҥа үлэһит Бу күннэргэ бөһүөлэккэ биэлсэр кыыс тиийэн, биир тыын боппуруос быһаарыллан олороллор. Анал үөрэҕи бүтэрэн улууһугар үлэлии кэлбит эдэр исписэлиис Бастакы Хаҥалас нэһилиэгиттэн төрүттээх Нарыйаана Винокурова «Земскэй быраас» бырагырааманан биэлсэрдии кэллэ. Саҥа үлэһити ититэр ситим холбонноҕуна исписэлиистэр дьиэлэригэр олохсутуохтара. 📚Үөрэхтээһин С.Н.Горохов аатынан Ойуһардаах орто оскуолатыттан олох киэҥ аартыгар 4 оҕо атаарыллыбыт. Бу күн икки выпускник үөрэх үрдүк кыһатыгар (АГАТУ) киирбитэ биллибит. Быйылгы үөрэх дьылыгар оскуолаҕа 55 оҕо үөрэнэрэ, «Ладушка» уһуйааҥҥа 23 оҕо иитиллэрэ былааннанар. Оскуолаҕа аангылыйа тылын уонна история, обществознание учууталын миэстэтигэр аһаҕас вакансиялар бааллар. Бу сайын үлэ уонна сынньалаҥ лааҕырын иитиллээччилэрэ 60 туонна от оттоон, оскуолаларын сүөһүлэрэ сыл тахсар аһылыктарын бэлэмнээбиттэр. 💬Үлэ үөрэх туһунан оскуола дириэктэрэ Марианна Гаврильевна Жиркова кэпсиир: «Лааҕыр оҕолоро оҕуруот аһын хортуосканы, оҕурсууну, помудуору, тыыкыбаны, сүбүөкүлэни, луугу, укуруобу, салааты, земляниканы уо.д.а олордон лааҕыр оҕолорун сибиэһэй иҥэмтиэлээх аһынан аһаттылар. Ордуммуттарын нэһилиэнньэҕэ атыылаатылар. Оҕуруотчуттар лааҕырдарын оскуола завхоһа, бөһүөлэк биир бастыҥ оҕуруоччута Александра Оконешникова уонна учуутал Екатерина Гуляева салайан үлэлэтэллэр. Үлэ лааҕырын оҕолоро от үлэтин бүтэрээт, оскуола хотонугар ньирэй көрөн, ынах ыан, хотон тэлгэһэтин хомуйан, оҕуруот буорун таһан, быраактыка ааһан күүстээх үлэлэри толордулар». 🐄Тыа хаһаайыстыбата Улуустааҕы тыа хаһаайыстыбатын управлениета иһитиннэрэринэн нэһилиэккэ 182 ынах сүөһү (ыанньык ынах — 82), 206 сылгы сүөһү (113 биэ) баара бэлиэтэммит. Ойуур баһаарын бохсуу ыарахан күннэрэ да турдаллар, үлэ дьоно оттуур кэмнэрин мүччү туппатылар. Билигин нэһилиэккэ уопсайа 920 туонна от оттонон, былаан 87% тэҥнэспит. Мантан сылгы Собуота 270т. оттообут. Собуот филиалын Родион Бандеров салайар. Ынах сүөһүнү иитэр тэрээһиннээх хаһаайыстыбаларынан Петр Гаврилович Винокуров, Мария Пантелеймоновна Носова, сылгы сүөһүнү тутар бөдөҥ хаһаайыстыбалаах дьонунан Виктор Николаевич Винокуров, урбаанньыт Дмитрий Алексеевич Жирков буолаллар. Кэтэх хаһаайыстыбалаах дьон өҥөтүнэн үүт, арыы, сүөгэй, уо.д.а. үрүҥ ас нэһилиэнньэҕэ атыыланар. Кууруссалаах дьон сымыыт атыыланан эргинэр. 📰Бу курдук Сиэн Күөл нэһилиэгин билиҥҥи олоҕун-дьаһаҕын туһунан кылгастык сырдатан сурукка үйэтиттибит.