✒ Тэк кәртӑӊ айӆат тохтур нє — 4 июля 2026 г. в 06:42:24.449
✒ Тэк кәртӑӊ айӆат тохтур нє Аудиоматериал на хантыйском языке Тӑм ванӑн Сўмӑтвош район Тэк кәрта я̆ӊхмємн ма уша вєрсум, тәняӆ щив Ишим вош эвӑӆт ай тохтур нє Валерия Игоревна Фалькова юхтӑс. Ма ӆўв пиӆэӆа вәйтантыйӆсум па мосты вєрӑт оӆӑӊӑн иньщӑссум. Ӆўв Ишим вошн сєма питӑс, щӑта єнмӑс, вошӑӊ медколледжӑн ай тохтура вәнӆтыӆӑс. Интернет мухты рәпата кӑншмаӆн ӆўв уша вєрӑс, Сўмӑтвош район Тэк кәртӑн ай тохтур мосӆ. Валерия имухты Сўмӑтвош район пәӆьница кәща нєӊа Екатерина Александровна Сагандуковая карты кеӆ хўват ястӑс, хуты щӑта рәпитты ӆӑӊхаӆ. Щиты 2025-мит оӆ лыпӑт хойты тыӆӑщ 3-мит хӑтӆ вўш эвӑӆт Валерия Игоревна Фалькова Тэк кәртӑӊ ай пәӆьница кәща нєӊа йис. Валерия ястӑс: - Мўӊ вән щемьяевн ма – оӆӑӊмит тохтур нє. Ӑшколайн биология па химия урокӊӑн сӑмӑӊа тӑйсум. 9-мит класс етшуптумєм пурайн ма рўщ ясӑӊ, математика, биология па химия хўват экзаменӑт я̆ма мӑсум па медколледжӑн вәнӆтыйӆты питсум. Щӑта вәнӆтыйӆты щира ма арсыр ӆавӑрт утӑт вантсум, тәп так нумӑс тӑйсум – ай тохтура йиӆум, мира нётты питӆум. Тыв рәпитты юхӑтмємн ма «Земской фельдшер» поступсы щирн и миллион шойт вух ёша хоӆумсум, вет оӆ рәпитты мосӆ. Мӑнєма тӑта әмӑщ вәӆты па рәпитты, мосӑӊ, еӆӆы вәнӆтыйӆты питӆум па тӑта рәпитты па вәӆты хӑщӆум. Материал на сайте https://khanty-yasang.ru/khanty-yasang/no-12-3696/22765 #ХантыМансиМир #ХантыЯсанг #статьиОРНГ #ТекстНаХантыйском