✒ Вой хурасӑт тӑйты хотӆ оӆӑӊӑн айкеӆ тәс — 12 июля 2026 г. в 13:22:55.365
✒ Вой хурасӑт тӑйты хотӆ оӆӑӊӑн айкеӆ тәс Тӑм оӆ Ай кєр тыӆӑщ юхи хӑщум хӑтӆӑтн Сәрханӆ район Русскинской кәртӑн «Вой-хўӆ веӆпӑсӆӑты па вўӆы ӆавӑӆты ёх» є̈мӑӊхӑтӆ вәс. Рәпатає̈м щирн щӑта вәсум, хӑнтэт эвӑӆт айкеӆӑт ӑкӑтсум. Ӛхӑт щи кәртӑн вєрум вой хурасӑт тӑйты хота я̆ӊхсум па щи тӑхи кәщая вәӆты Татьяна Ядрошникова пиӆа я̆мкєм хўв ия̆ха путрємӑсмӑн. Вантэ, щи ут ӆўв ащеӆ ики шәӊӑт Александр Павлович Ядрошников вәӆты-хоӆты хўваттаӆн айӆтыева ӆэщӑтӑс. Мосӑӊ, щи вєр пӑта тӑмхӑтӆ Русскинской кәртэвн вой-хўӆ хурасӑт тӑйты хот, рўщ ширн «Музей Природы и Человека» А. П. Ядрошников нємн ю̆кантсы па ӆўв вән эвеӆ Татьяна Александровна тӑта кәщая рәпитты павӑтсы. Щи вуӆаӊ вєрӑт пӑта ма тӑта нємасыя ӆўвеӆ иньщӑссєм: Ин нӑӊ «Музей Природы и Человека» оӆӑӊӑн мӑтты айкеӆ мўӊева тўва, муй щирн рәпитӆӑты? Ма ащєм шәӊӑт нємн ю̆кантум па вєрум музей хотн катратєӆн кәща нєӊа рәпитӆум. Мўӊ хущева наука щирн рәпитты нєӊӑт кашӑӊ пўш сыр-сыр тәс айкеӆӑт хӑншӆӑт, муй щирн тӑм муй тумӑщ вой па хўӆ хурасӑт тӑта вєрсыйт. Ащєм ики шәӊӑт 1988-мит оӆ вўш эвӑӆт тӑм музей хотӆ ӆэщӑтты вўянтӑс. Щи пурайн мўӊ Русскинской кәртэвн ар пєлӑк иса хӑнты хәйт-нєӊӑт вәсӑт. Ащєм шәӊӑт тӑм музей хот вєрӑс. Ӆўв, вантэ, щи йисн хӑнтэт кўтн вәнт вой сухӑт вўйман вәс па рәпитӑс. Ащєм хәс муӆтас оӆ мӑр вой веӆпӑсӆӑты хӑнтэт кўтн вәс па кашӑӊ хӑнты хә муй няврєм, мӑта хуят Тромаган юхан ай вәнтӑӊ кәртӑт хўватн вәс, я̆ма вәйтсӑӆэ. Ӆўв ищиты мўӊ хӑнты ёхӆўвн сӑмӑӊа тӑйсы. Щи вєр пӑта, хән ащєм шәӊӑт «Музей Природы и Человека» ӆэщӑтты нумӑс вєрӑс, хӑнты мир ёхӆўвн-нєӊӆўвн я̆ма арсыр мосты нётупсыйн ӆэщӑтсы. Атэӆт щирн ӆўв тӑмӑщ вән па хурамӑӊ вой хурасӑт тӑйты хот хән мущатӑс. Щит пӑта щи, хән Александр Павлович нумӑсн юхӑтсы, вой па хўӆ хурасӑт ӆэщӑтты хот тӑта вєрты, ӆўв хӑнты мирев ёхн нётсы. Вантэ, ащєм ики ӆӑӊхас тӑта ӑнтә тәп вой па хўӆ хурасӑт сыр-сыр мир хуятӑта ванӆтӑты. Ӆўв ӆӑӊхӑс хӑнты мирев йис вәӆты-хоӆты щирӑт па вєрӑт ванӆтӑты, ӆәӆн мир ат нәмӑссӑт, хӑнты хуятӑт катра па тӑм хӑтӆӑтн еӆӆы вәӆты питсӑт. Щимӑщ вуӆаӊ вєрӑт пӑта ӆўв кашӑӊ пўш хӑнты ёхӆўв йисӑӊ-нәптӑӊ хәйт-нєӊӑт па иньщӑсӑс, муй ӆўвеӆа щи пӑта вєрты рӑхӆ, муй па иса ӑн рӑхӆ. Материал на сайте https://khanty-yasang.ru/khanty-yasang/no-13-3697/22871 #ХантыМансиМир #ХантыЯсанг #статьиОРНГ #ТекстНаХантыйском